古天后日誌｜恒指或下試20100回補上升裂口

4月21日，大致多雲，初時有一兩陣驟雨，日間部份時間有陽光。隔晚美股個別發展，道指升249點；標指跟納指分別跌2點及166點。業績不如預期的串流影視平台Netflix周三急挫35.12%，拖累高估值股份受壓。不過美國解除口罩令，航空股反彈支持道指上升，不過美國石油庫存意外地大減，刺激油價期貨再度回升，航空股嘅反彈睇怕難以維持。

另一方面，美國聯儲局公布稱為《褐皮書》嘅地區經濟報告指，自2月中旬以來，美國經濟平均溫和地擴張，部份地區報告適度就業增長。另外，報告引述企業預計，未來數月通脹恐將持續。喺通脹高企下，越來越多聯儲局委員指，未來息口可能會更高。芝加哥聯儲行長Charles Evans表示年底通脹將高企於3%至3.5%水平，由於仍遠高於2.5%的通脹中期目標，息口最終會高於2.5%。債息則繼續破頂，30年息升穿3%至3.012%，10年息也升至2.96%。留意當10年債息高於3%時，債券吸引力將遠勝股市，屆時資金或從股市大量流進債市。

美匯指數持續強勢

與此同時，美匯指數持續強勢，人民幣亦因人民幣債息跟美債息出現倒掛而回落，預期下半年美元會加快回流美國，料人民幣壓力更大。人民幣轉弱令A股亦走弱，降準僅0.25厘亦未令市場滿意，內地股市唔單止反彈乏力，就連成交亦持續縮水，反映資金不僅未願入投入股市，甚至從股市流走。

至於港股亦偏軟，大市自上月中低位反彈至22400點後，未能真正突破向上，再失守22000點已確認之前嘅反彈浪已完結，並再出展回調，而計返由3月中低位18200反彈至22400至22600點嘅回調黃金比0.382計算，大約係20800左右，目前大市已回調至呢個水平。但呢幾日大市回落至21000水平之下，仍未見有資金流入買貨，反映市場認為現水平嘅港股仍未夠吸引，可能要待大市回補3月中所遺下嘅上升裂口底部，20100點，方有資金肯入場。雖然大市未必一定回補裂口，但20800點頗為關鍵，若然呢兩日失守，咁落去補裂口機會將較高，反正買貨唔使急，不妨睇下呢兩日港股會否回落補裂口，可以分段入場買入具基本因素支持，而估值合理嘅重磅指數股，如騰訊(00700)、美團(03690)及京東(09618)等等。

古天后

(徐狄怡，證監會持牌人)