獨家丨旨呈睇見都覺得抵打首拍劇演招積二世祖

2022-04-09 20:00

旨呈（鄺旨呈）初次挑戰演技，接拍「亞洲心動娛樂」網劇《逐流時代》，飾演愛夾band溝女又招積的二世祖「Nio 」，有機會拍金牌監製戚其義作品，又與前輩黃德斌做對手戲，令旨呈整個過程都戰戰兢兢，幸好大家都好照顧他，而他第一次看到自己在劇集中演出，感覺新鮮又有趣，笑言都覺得角色好抵打。

採訪：杜杜

旨呈在劇中經常受傷，他笑指因太乞人憎而不時被打。

能夠跟金牌監製戚其義合作，旨呈認為是成就解鎖。

旨呈Casting時，跟監製兼導演戚其義傾偈，講了自己的音樂歷程後，再埋位試戲，好快便落實演出機會，「佢話我氣場同氣質都似個角色，覺得我記劇本能力，同臨場發揮都幾好。」不過令旨呈最興奮是最初角色只屬客串，試鏡成功後竟加戲，「見完導演佢覺得可以加返重啲我條線，雖然都唔係好多戲份，但成套戲都有份，自己已經覺得好滿足，仲有機會唱埋片尾曲《寄生》，真係第一次喺劇集聽到自己歌聲，感覺真係好得意，好有滿足感。」

旨呈首度跟麥子樂和麥明詩合作，相處愉快。

旨呈首度跟前輩黃德斌拍戲，雖緊張但學到嘢。

旨呈只試過唱歌和綜藝，第一次演戲自然特別緊張，「真係同做綜藝好唔同，綜藝好多時係睇臨場發揮同執生，但係演戲要投入角色，令到對白係發自內心咁講出嚟，真係好有難度。」旨呈拍第一場戲更要遇上前輩黃德斌，壓力更加大，「嗰場已經係廿幾集嘅劇情，要同德斌鬧大交，仲要打爆玻璃杯，但之後突然跳返去拍第10集另一場鬧交戲，要唔同情緒，嗰時大家已經開咗廿幾個鐘，拍到零晨，但係德斌仲同阿爺（戚其義）、副導一齊幫我分析，德斌好肯教我，佢雖然埋位個氣場好勁，最初對住佢都好驚。但係慢慢發覺佢都好玩得。」

跟現實一樣，旨呈在劇中也有隊Band。

劇中旨呈跟黎紀君是Band友，後來發展成情侶。

拍劇成就解銷

劇中旨呈演的二世祖「Nio」，他強調除了對音樂熱誠愛夾Band外，基本上跟他完全不同，他更指其實「Nio」不算太壞，「接劇本時知佢係二世祖，個概念都係牙牙擦擦嗰啲，知多咗佢屋企背景，對佢都有啲唔同睇法。」不過背住劇中女友黎紀君溝女一幕，旨呈作為觀眾都睇唔過眼，「第一次睇自己演戲真係幾特別，似自己但係又唔係自己，睇見自己畀人打，都想摑自己一巴！其實拍嗰時好驚，因為現實冇試過畀人咁打過。」

作為愛溝女的二世祖，旨呈當然有偷食戲份。

被「女友」黎紀君撞破偷食的旨呈，連他自己都覺得抵打。

今次演戲經驗，令旨呈成就解鎖，未來都想多演戲，「有機會同金牌監戚其義同黃德斌合作，角色亦都好特別，未來都想演多啲戲，有多啲唔同機會。」除了新劇推出，旨呈最近還成為ViuTV節目《MM730》逢周二晚的《粉絲福利署》固定主持，題材新鮮之餘，亦開心同兩個拍檔合作，「Pony（蔡寶欣）喺《造星III》已認識，同阿正（黃正宜）喺《囝囝女女730》亦有合作過，但唔算好熟，大家仲需要啲時間磨合，不過大家都好玩得，相信嚟緊會有更多火花。」