古天后日誌｜恒指失守10日線淡友暫佔上風

4月8日，天晴，日間炎熱及非常乾燥。美股隔晚先跌後回升，市場仍然擔心聯儲局放鷹，收水速度急速，道指盤中最多跌逾300點，其後倒升87點，標指則險守4500點，標指扭轉勢，回升8點。美股隔晚得以從底位反彈，全靠兩年債息回落從，30年債息走向，估計短債息短線會喺2.80%見頂，隨住息口回落，美股有望靠穩。不過聯儲局放鷹後，市場對反彈信心受挫，對後市有一定影響，美股再次踏入業績期，屆時要注意業績公布後，企業股價表現如何，上季係唔少美企出咗財報之後，股價均見回落，從而引發一輪深度調整。

至於港股呢邊，受外圍股市較為疲弱影響，恒指噚日22000關得而復失，走勢上明顯轉弱，喺中概股表現疫弱下，港股嘅科技龍頭股反彈勢頭亦受阻，暫時恒指已失守10日線(21936)，有機會向住20日線(21404)點尋找支持，而恰巧大量牛證街貨於21300至21500之間結集，唔排除恒指可能向下試20日線支持之餘，順手劏埋呢批肥牛。

不過內地經濟受疫情反覆影響而明顯轉弱，當美國因為通脹而要收水之際，內地則剛好行相反方向，或有機會放水以穩定經濟。噚日已提及人行或於本月內隨時出手降準降息，以為市場注入資金拉動經濟，一旦人行落實放水，對中港兩地股市料有短暫刺激。港股亦有機會借機向上挾淡倉，畢竟為數唔少嘅熊證於22500至22700結集，而呢兩日亦見22300至22500開始再有新嘅熊證獲淡友垂青。

雖然港股失守22000有轉弱之嫌，但睇返呢幾日大市回調，成交未見顯著增加，只係一個買賣兩閒局面，奈何大市缺水，喺未有新資金流入下，向上嘅動力亦好有限，以至港股暫時或進入上落市格局，暫於21500至22500之間上落，除非有重大利好消息，如降息降準等消息配合資金流入股市，否則港股喺外圍弱勢下，亦只有以守代攻。

但誠如古天后上月已講過，外資於2月初起刻意做淡，至上月中阿爺出手，國家隊入場，18200-18400水平已成功尋底，對於坊間有淡友指港股仍未見底，或進一步下試16000點水平嘅言論不敢苟同，尤其刻下港股嘅估值已跌至合理水平，個別股份更算得上吸引。好似京東(09618)跟美團(03690)等大型科技股，前者盈利表現穩步增長，後者則有機會扭虧為盈，最近公布嘅業績亦令機構投資者對其前景投下信心一票。當美團股價300元水平時，仍離扭虧日子甚遠，但市場卻爭相搶入，如今股價已調整五成，業績今年第四季有望扭虧，現價入場相對值博率遠高於300元嘅美團。

古天后

(徐狄怡，證監會持牌人)