Juicy叮｜趁愚人節惡作劇兼營銷 IKEA、實惠等邊個企業最搞笑？

今天是4月1日「愚人節」，不少企業都趁機在社交平台開玩笑並推出宣傳活動，這些玩笑看似荒謬，但令不少網民看過以後都會心一笑。

IKEA宜家家居

IKEA在社交平台公布「NFT」項目，展示顧客遺留在店內的垃圾。IKEA facebook專頁圖片

IKEA在社交平台公布舉行「NFT」搜集活動，公開讓顧客搜尋其他客人遺留在店中寶物（又俗稱「垃圾」），由即日起至4月4日，顧客只需在店內尋找心儀的「NFT」拍片上傳並留言，就可以，留言記錄於IKEA 美食站收銀處換領爆谷，收集到更多「NFT」更可獲熱狗券作獎勵。

 

Pricerite實惠

Pricerite在社交平台專頁宣布招聘「床褥試瞓員」，宣稱只要是「懶瞓豬，呢份筍工就Fit 晒你」，「工作」年齡經驗不限，只要瞓得，並有意成為HEA爆床褥巨星，就可留言查看「筍工」詳情。而實際上，這份「筍工」是床褥折扣及在家試用180天優惠，只要將指定款式床褥買回家，就可以當「試瞓員」180天。

Pricerite facebook專頁圖片

九巴

九巴在社交平台宣布，為迎合「元宇宙」潮流，九巴仔決定推出NFT，並會走入元宇宙，決意打造一個獨一無二的九巴仔世界，大家除咗有九巴仔親筆簽名，仲可以選擇佢搭唔同嘅交通工具，咁以後無論上山定下海，就算去到天涯海角都有九巴陪住。九巴仔NFT產品將不日上架。小編又表示只有網民反應熱烈，相關NFT產品也有機會上市。

九巴 facebook專頁圖片

港鐵

港鐵在社交專頁稱推出「車內「廂」親Speed Dating服務」一日限定愚人節活動，助乘客大家邂逅緣份，即時來一個幾分鐘約會。
時間：一個站嘅時間，每到下個站就要換位
地點：10條鐵路綫，任何一個港鐵站
收費：不成功，只收基本車費，成功另計
貼士：預先準備好話題、盡情燃燒你嘅社交魂

港鐵facebook專頁圖片

杜蕾斯

安全套品牌杜蕾斯食住兩餸飯疫市彈起商機，宣稱推出一系列「港式撚手小菜味安全套」包括「餘香茄子」、「梅菜扣慾」、「show me肉粒」口味，又歡迎網民留言，創作出最喜歡的味道，勝出者有機會獲得禮品。

杜蕾斯facebook專頁圖片

譚仔雲南米線

譚仔在社交專頁提到，自古以來扇都有祝福嘅意味，一般嘅扇係以竹枝交疊而成，而譚仔新推出的「米．扇」就以63萬條米線交織而成，並且經過譚仔姐姐長時間使用麻辣湯烹煮。除咗有陣陣譚仔獨有嘅麻辣香氣，微風仲可以通過呢把「米．扇」帶出溫柔又舒暢嘅感覺，無論天氣幾熱都不用怕。

而且這「米．扇」不單可以散熱，更可以解辣，有它以後去譚仔食幾辣都輕鬆冇難度，不過記得以後去譚仔就要帶埋呢把「米．扇」 喇！而由於米線嘅高彈性，無論係尷尬、悶氣抑或係緊張嘅感覺，只要用呢把「米．扇」輕輕一撥，就可以一「撥」而空！

譚仔雲南米線facebook專頁圖片

立即下載｜全新《星島頭條》APP：https://bit.ly/3yLrgYZ