獨家丨鄭融研究開胃泡菜食譜 余詠珊新節目教煮家常菜

前無綫非戲劇節目監製及經理張志明去年10月請辭後，跟余詠珊組新公司「好好製作」，頭炮重點新節目《疫境中的餐桌》於4月4日首播，搵嚟昔日「地獄廚神」鄭融、《試當真》演員陳穎欣(Yanny)、梁茵及星級大廚張錦祥 (Ricky)、余健志(Jacky)等以「快靚正」煮出簡單家常菜，及不一樣的好味道。採訪：方騫平

黃愷怡跟強哥及Stanley學嘢。

《疫境中的餐桌》於下周一晚上8時半在香港開電視77台播放，共45集，除咗由大廚教煮餸外，更聯同食肆及商戶合作推出開電視優惠套餐畀觀眾。張志明強調，𠵱家生意難做，所以今次全部冇收廣告費，希望能共渡疫境，對觀眾嚟講都係雙贏，學到煮簡單家常菜同時，又可以買平嘢。

張志明最擅長製作飲食和旅遊節目。

陳穎欣變身食評家

當日梁茵及鄺芷凡錄影首集，由名廚「串嘴」強哥及Stanley教做醬爆肉絲及薑蔥豬扒，鄺芷凡形容大家喺抗疫疲勞下，食得開心及健康好緊要；梁茵平日喺屋企來來去去都係蒸水蛋、蒸排骨、菜心炒牛肉，今次學到新嘢，又形容識煮嘢嘅男仔好有魅力會加分。

梁茵及鄺芷凡係首集嘉賓。

梁茵被讚係「高級豬扒」。

另外，嘉賓之一嘅鄭融由「地獄廚神」變身「疫境廚神」：「疫情下要調節生活適應新常態，例如去街市買餸，要考慮埋點樣儲存到食物，買得太多又會嘥，呢啲全部都係學問。」而她研究到泡菜食譜，既開胃又健康。至於陳穎欣就覺得留喺屋企好舒服，好自在，今次喺節目更變身食評家，獲益良多。

鄭融喺疫情下食得健康。

梁凱寧及鄭融齊向名廚Ricky及Jacky學嘢。

陳穎欣喺節目中偷到師。

更多第5波疫情資訊，請到以下專頁瀏覽（按此）
立即下載 | 全新《星島頭條》APP : https://bit.ly/3yLrgYZ