獨家丨袁富華心願做齊鏡仔老竇《反起跑》演校長過足癮

2022-03-31 08:00

打埋算盤7位小演員跟Ben 哥都有點關係，「佢哋跟我學生學戲，（你咪師公？）佢哋都係想咁叫，但係我怕醜。」

袁富華（Ben哥）最近在ViuTV劇《反起跑線聯盟》演百厭「孔校長」，講到劇中「學生」，他大讚可愛又專業，不過未有改變他跟女友過二人世界想法，但講到演戲，他就好享受當爸爸，在ViuTV新劇《季前賽》演Edan（呂爵安）@MIRROR爸爸的他，更聲言心願是做齊12個鏡仔老竇。

採訪：杜杜

52歲Ben 哥雖然喜歡小朋友，但演父親可以，做真爸爸就怕怕。

Ben 哥認為同小演員愉快合作，秘訣就是融入他們圈子。

Ben 哥謂到現在也很懷念小演員齊大叫「孔校長」的情景，因劇中童星真的太可愛，而且幾歲人仔表演相當專業，令他好感動，「演肥仔同娟姐個囝囝個小演員，有場畢業戲小朋友要逐個上台，佢排到尾二上台，上到台你估佢隻手充滿啲咩？係鼻嘅分泌物，哈哈！其實佢本身好易鼻敏感，但佢知拍緊嘢，咪唔出聲一路搵隻手抹，你就見到佢嘅專業態度，呢樣嘢係令我好感動。」

劇中Ben 哥跟老友潘燦良大鬥演技，相當好玩。

Ben 哥最懷念一班小演員，齊齊叫他「孔校長」。

現實無意做老竇

講起一班小朋友，這個「孔校長」就勁冧，但跟圈外女友拍拖多年的他，未有動搖不當爸爸的想法，「唔好啦啩！有咁嘅精力湊，我有個朋友佢生兩個細路相隔4年，佢都話冇力湊，更何況我呢啲年紀，都係二人世界算啦！兩個夠晒數，哈哈！」

Ben 哥跟梁詠琪雖然是首次合作，但好快磨合出默契。

Ben 哥首次做MIRROR成員老竇，就是《無限斜棟有限公司》與Ian演父子。

現實不想做老竇，但演戲Ben 哥就唔怕多，仲想做齊MIRROR 12子爸爸，因為他繼在ViuTV劇《無限斜㨂有限公司》做過Ian爸爸後，最近在《季前賽》又做Edan爸爸，他大讚這個「仔」夠聰明，「其實我唔係第一次同佢合作，《娛樂風雲》雖然冇乜對手戲，但係同佢都傾過偈，有場戲我同佢分享，講咗幾句，佢就識得做跟住嗰場戲，所以佢哋成功唔係靠運氣囉！我有個心願，就係做齊鏡仔嘅爸爸，哈哈！不過隨緣，唔好咁多嘢心！」