毛舜筠因時差計錯數上唔到機幾經辛苦終於返到香港

2022-03-12 20:30

毛舜筠（毛姐）受疫情影響超過一年冇見啲女，去年尾趁拍完電影，與老公區丁平飛到加拿大與兩女一家團聚過聖誕，但不久香港疫情就升溫，港府對美加英法等國家實施「熔斷機制」，令本來就趕住回港拍新電影的她滯留加拿大。毛姐上月中身在加拿大時，接受李婉華訪問，分享自己搵方法回港的辛酸過程。

毛姐同老公去年飛往加拿大探望兩個女。

毛姐上月接受李婉華訪問，分享自己搵方法回港的辛酸過程。

她早前就分享過回港大計，決定繞道去曼谷過冷河14日再返港。昨日（11日）她在YouTube表示幾經辛苦終於回到香港，不過原來都唔係咁順利，事關她計錯數，「喺嗰9個熔斷嘅國家，準備返港嘅一定要留意，我之前咪講過政府個網站有個日曆，話如果你1號離開嗰個地方（加拿大），咁2號開始就係（外遊史）第一日喺曼谷，跟住15號就係整整（外遊）14日，咁我16號咪可以返嚟香港囉！」但16日當天她到機場卻上唔到機，因為她計漏咗加拿大有時差，最後要改機票、改隔離酒店入住日期，搞到17號先上到機。

毛姐終於成功返到香港。

臨返嚟香港前計錯數。

毛姐於YT片中再大呻過去2個月嘅辛酸，「喺加拿大受盡香港政府熔斷機制的折磨，因為每次有新措施話我哋又唔返得香港嘅時候，都係我哋嗰邊嘅半夜，要即刻起身改機票同隔離酒店。好擔心改到機票又冇酒店住，我經歷咗4次呢啲過程。」現時如果身在這9個實施「熔斷機制」國家的香港居民，要返香港最快都要等到4月20日，可能仲會延長，所以毛姐決定先繞道去曼谷再返港。而毛姐又分享喺香港隔離酒店的工作人員做事亦都非常急，令她情緒非常緊張和煩躁。又提到日前政府發出緊急警報到香港市民的手機時，嚇到心都跳出嚟，「我問老公香港係咪淪陷啦？所以我哋必須要調節好自己心情。」她呼籲大家每日多啲練習深呼吸，用正面態度面對疫情下的香港。