古天后日誌｜俄烏戰火下 全球股市難有運行

3月9日，天晴乾燥，早晚較為清涼。俄烏局勢持續緊張，美國政府宣布禁止俄國石油進口，刺激油價再度飊升，美股表現側反覆。道指盤中曾一度升近600點，但尾市三大指數仍要下跌，道指全日跌184點，標指跟納指分別跌30點及35點。俄烏經過三輪談判後未見結果，戰事持續，令各大投資機構繼續看淡美股，就連長期美股好友亦轉呔，主要係油價不斷上揚及通脹高企，導致滯脹風險升溫，更不排除會出現衰退。

大宗商品價格喺俄烏爆發戰爭以嚟狂飊，其中(LME)鎳價繼周一暴漲72.67%後，周二盤中曾飆逾一倍，每噸高見10.13萬美元(約79.06萬港元)，創歷史新高。市場傳聞更指，有內地大戶遭「挾淡倉」，損失恐達80億美元(約624億港元)！因應行情劇烈波動，LME於本港時間周二下午緊急暫停了所有鎳期貨交易。LME指，俄烏局勢顯然影響了鎳市場運作，基於「市場秩序」而作出了呢項決定；又謂將籌劃重新開放交易，但唔排除會連續多日停牌。鎳期貨孖展嘅保證金要求，會按周一收市價計算。

鎳為重要工業金屬之一，常用於製造不銹鋼；亦可以作為電鍍原料；喺石油化工氫化過程中用作催化劑；亦用於製作鎳氫電池、鎳鎘電池等電子設備及電動車電池。事實上，鎳價飆升固然有俄烏局勢影響，但俄國嘅鎳礦產量實際僅佔全球約9%，目前升幅已明顯脫離供求等基本因素。有傳聞指有資金趁鎳礦供應受限之際，炒起鎳價狙擊中國最大鎳礦巨頭、不銹鋼生產商青山控股，導致其所持有約20萬噸鎳淡倉慘遭血洗，因沒有足夠現貨交割，惟有大手買貨平倉，引發鎳價失控喪升。市傳青山控股今次損失達80億美元，項光達回應內媒查詢時聲稱，目前青山嘅投資倉位和經營都沒有問題。

無論LME暫停鎳期貨交易，令市場出現違約風險與否，鎳價瘋漲下，其他工業金屬亦極為波動。工業金屬暴漲對經濟復甦帶嚟更多隱憂，全球最大綜合資源企業必和必拓行政總裁韓慕睿預測，今年全球經濟增速或低於5%，因大宗商品價格飆升，可能會對通脹產生「溢出效應」，而俄烏戰火則進一步帶來不利影響。換句話講，俄烏戰事一日未能結束，對全球經濟所帶嚟嘅禍害愈大，如此情況下，全球股市又點會有運行。

古天后

(徐狄怡，證監會持牌人)