古天后日誌｜恒指累跌4000點 季度波幅已足夠

3月8日，天晴乾燥，早上清涼，日間有陽光，較為溫暖。俄烏第三輪談判無任何成效，需要進行第四輪談判，但戰事卻升級。喺戰事持續下，通脹壓力加劇，市場對經濟衰退恐慌等幾個利淡因素持續夾擊下，拖累美股繼續下滑，三大指數以全日低位收市，道指跌797點；標指跌127點；納指更跌逾3%，跌482點。

大摩警告未來兩個月股市下行風險嚴重，目前跌市的持續時間、下跌幅度都難以預測，陰霾繼續籠罩着大市。佢建議保持防禦型策略，降低投資組合風險，尋找具有卓越營運效率及盈利穩定嘅公司。至於花旗嘅策略師亦表示，市場分析員對企業盈利預期，自2020年9月以嚟首次轉為負值，反映市場「規則可能已經改變」，削弱O左分析員對風險資產前景嘅信心。該行將標指年內目標從5100點下調至4700點，以反映地緣政治風險更廣泛地影響市場預期估值。呢兩間大行嘅預測，無疑都係睇淡高增長股，即係美股再難靠呢類股份支撐。

目前大家最關心係究竟目前股市嘅幅，已足夠反映上述利淡因素未，喺俄烏局勢緊張下，加速O左市場資金避險。其實俄烏陷入戰事，戰況更甚為激烈，呢一點市場確係未有預期到發展到咁樣。戰事單止涉及俄羅斯進攻核設施、俄羅斯遭踢出環球金融電訊協會(SWIFT)，甚至喺歐美禁止進口俄原油等。究竟戰事發展落去繼續會點，實在無人係先知已難預料，相對嚟講，其後發生嘅事可以點影響股市，亦都無人知，即係股市即使喺嚴重超賣下反彈，再有任何關於戰況嘅負面消息，股市可以繼續下跌。

不過港股第一季已餘下一足三個星期時間，近日更大量牛證重貨區，先後被屠殺，而恒指喺呢段時間，亦已累跌4000點，以季度波幅計，其實呢個點數都足夠，只有有稍為利好消息，港股都有機會喺嚴重超賣下作出技術性反彈。只係目前喺外圍地緣政治局勢下，加上本地疫情嚴峻下，暫未見有利好消息支持反彈。不過疫情若能逐步受控，而重提跟內地通關消息下，或者係港股反彈嘅一個契機。

古天后

(徐狄怡，證監會持牌人)