獨家丨黃浩然家有愛睇書的囝囝一家四口分批書店揀書

2022-03-03 22:30

因為第5波疫情超嚴峻，政府進一步收緊社交距離措施，有關公眾地方群組聚集的人數限制由四人減至兩人，一家四口出街食Lunch都要分兩枱。日前，黃浩然夫婦同兩個囝囝10歲Kayden及8歲Ransley去銅鑼灣誠品睇書，一家四口冇企埋一齊，全程玩孖咇，兩個仔或兩公婆，一係老婆同大仔。採訪:梁志明

TVB熱播中的劇集《家族榮耀》中都見到黃浩然，佢飾演二少爺馬耀祖，出軌又衰格，成日要飾演老婆甄芯嘅楊茜堯執手尾，獲網友封「渣男」。最新一集中，佢認定楊茜堯害死二奶及私生女而嬲爆，但想發脾氣大鬧之前炒車身亡。對於貴為男主角之一嘅黃浩然咁快玩完，觀眾都覺得好吊癮。

《家族榮耀》中的馬耀祖已車禍身亡。

兩個大人對書本冇乜興趣
日前下午，黃浩然老婆同兩個仔現身銅鑼灣，三人上咗希慎誠品睇書，兩位小朋友冇四圍走，真係好認真揀書嚟睇，主力睇幫助小朋友培養閱讀力嘅橋樑書，如《小小紙箱工程師》及《小火龍大賽車》等，而媽媽就企埋一邊撳電話，隔咗冇耐黃浩然現身，兩個大人掛住撳電話，半頁書都冇揭過，而兩個小朋友就係咁睇，一家之主逗留十多分鐘同老婆透露已訂枱食午餐，老婆就催促囝囝揀書再去埋單。