王丹妮爭最佳電影角色獎保持初心 馮皓揚演蘇樺偉開心獲提名
2022-03-01 07:00 
香港電影編劇家協會三年前增設「年度最佳電影角色獎」，表揚創作角色的編劇及演員，昨日（28日）該獎公布入圍名單，經由全體編劇會會員提名五強角色，在同票之下，今年最終有八個角色獲得提名，結果將於4月初公布。其中《梅艷芳》的王丹妮及《媽媽的神奇小子》的馮皓揚對有份入圍，感到鼓舞。
在《梅艷芳》中飾演梅艷芳（梅姐）的王丹妮，與飾演其童年的陳禛一同獲提名，王丹妮開心表示：「首先衷心感謝香港電影編劇家協會畀呢個機會我，亦都非常感謝投票畀梅艷芳呢個角色嘅每一位，能夠獲得提名喺呢一刻我真係感覺到非常幸福同幸運，對於身為一個新演員真係一份莫大嘅鼓勵，咁我會仍然保持初心，而且保持謙卑嘅態度繼續學習同感受，向點樣成為一位更好嘅演員，一步一步繼續努力前進。」
至於《媽媽的神奇小子》飾演蘇樺偉三個時期的梁仲恆、馮皓揚及蔡天諾也獲提名，其中4歲的蔡天諾更是歷屆年紀最細的入圍演員。馮皓揚得知消息後表示：「首先好開心入到香港電影編劇家協會『年度最佳電影角色獎』嘅入圍名單，多謝大家鍾意我少年蘇樺偉呢個角色，嚟緊都會繼續努力做好我嘅每一個角色，多謝大家。」梁仲恆則說：「好開心呀！可以提名到呢個最佳電影角色，首先第一個一定要多謝嘅係蘇樺偉本人，呢個係佢嘅故事，多謝佢用自己嘅生命譜寫出咁動人嘅故事，之後多謝導演尹志文，冇佢就冇呢個機會演呢部戲，另外要多謝另一位編劇盧文駿，多謝佢寫咗一個咁好嘅角色，之後係少年版偉仔馮皓揚、同埋兒童版偉仔天諾，成就呢個角色係我哋3個人一齊努力，所以多謝佢哋陪我一齊行呢個旅程。」
身兼《媽》片編劇的導演尹志文說：「好開心呢部戲裏面嘅角色蘇樺偉畀香港電影編劇家會提名『年度最佳電影角色』，由構思到電影面世差唔多都有10年，其實能夠將蘇樺偉嘅人生嘅成就同正能量，透過電影帶畀觀眾，我自己已覺得好感恩，希望佢嘅故事可以鼓舞更多嘅觀眾，亦都好慶幸呢部戲遇上3位演繹唔同時期嘅蘇樺偉嘅演員，佢哋3個嘅演出我覺得完全可以呈現蘇樺偉真人嗰份真摰同熱情，有時佢哋即使冇自己嘅戲份，佢哋都會留喺片場，去揣摩對方嘅演出一齊討論，佢哋嗰份努力都係想做好一個角色，希望觀眾會繼續支持呢班新一代嘅香港演員。」
更多新冠疫情資訊請到以下專頁瀏覽：（按此）
立即下載｜全新《星島頭條》APP：https://bit.ly/3yLrgYZ
最新回應