古天后日誌｜外圍走勢疲弱 港股亦難獨善其身

2月24日，早上天氣寒冷，日間大致天晴，非常乾燥，氣溫有所回升。俄烏局勢持續緊張，美股隔晚先升後回，道指跌464點，已連跌5日；納指同樣跌O左5日，隔晚再跌344點；標指則第四日下跌，跌79點。標指已經由1月3日歷史高位累跌近12%，跟納指齊齊陷入技術性調整。

大行對美股後市睇法不一，細摩指雖然東歐局勢發展仍有非常大不確定性，但市場已消化大部分負面消息，因此當局勢一旦緩和，美股有可能快速回升5%。不過美銀跟大摩就唔係咁樂觀，美銀警告美國國債孳息曲線「倒掛」最快喺今年底發生，即兩年期債息高於10年期，反映經濟衰退將於明年上半年出現。按過往歷史顯示，債券孳息曲線出現「倒掛」之後，經濟往往喺未來18個月內衰退，而且準確度高。至於大摩就話做O左一項調查，訪問O左718名機構交易客戶中，約48%視通脹為今年市場最大影響力因素、高於去年排首位，今年降至第二的疫情。預期喺通脹影響下，市場將會出現更大波動。

通脹會否出現失控式上升，暫時仍然係未知數，但俄烏危機或可能導致歐洲爆發大規模戰爭，進一步推高油價至每桶110美元甚至更高水平，令美國通脹升破雙位數。即使地緣政治局勢唔再升溫，可以肯定係未來一兩年，通脹都難以回落至聯儲局2%嘅目標。

目前美股正處於風雨飄搖之際，全球股市亦難獨善其身，港股雖然目前估值已低殘，再大幅下跌機會較微，但喺外圍股市走弱下，難免受影響而再度走弱，多條移動平均線失守，暫時支持位喺23000至23200，若然呢兩日仍未能重返23500，23000支持有機會再度失守，而下試上月低位22700。

古天后

(徐狄怡，證監會持牌人)