秦沛做新老爺兒子姜文杰「全2時刻」宣佈婚訊喻意成雙成對

2022-02-22 15:45

現年41歲、秦沛兒子姜文杰今日在社交網宣佈與拍拖9年的女友李泳淇（Rain）拉埋天窗，而今日是一個好特別的日子，既2022年2月22日星期2，兼農曆正月22日，姜文杰更特別花心思，在下午2時22分宣布婚訊！

姜文杰大晒多張婚照，其中他們抱着愛犬合照，並發表愛的宣言：「我們...結婚了。相戀時，你22歲，我32歲.. 命運安排我哋拍攝相識，所以當晚嘅珍貴時光永遠記錄喺一條片入面。」

姜文杰自認不是細心的男友，寫着：「同您一齊咁多年，大部份生日飯同情人節晚餐都安在家中煮飯食，有幾次仲浪漫到嘆麥記或譚仔外賣，你都冇半點怨言。講到禮物，更係少之又少。情人節我地習慣唔買玫瑰，反而年年買棵植物返屋企。情信，也從來冇寫過俾你。無論我揀邊條路，您都總會支持我.. 有咩諗唔通，您會陪我分析同傾訴.. 我有錯，您亦從來唔會怪責我.. 反而陪我一齊面對同正視生活上遇到既種種難題.. 喺一啲最難捱過既夜晚，你會扶持我，俾我感覺到你會一直陪我身邊支持我。作為我女友，呢幾年黎，辛苦了。」

姜文杰與細10年女友拍拖9年，終於拉埋天窗。

姜文杰感激太太一齊面對人生各種喜怒哀樂。

一個唔介意嘆麥記或譚仔外賣嘅好老婆。

姜文杰相信他們會有一段美好的婚姻，自覺好幸福，因為是彼此的Best Friend，會一齊面對人生各種喜怒哀樂。他並承諾會好好對老婆，並多謝父母、妹妹、Peanut、Jelly，以及家族每一位成員既愛。最後還冧爆留言：「Love You。從今以後，我會擔起一家之主既責任，每日努力為姜太太帶來簡單而美滿既幸福快樂人生。多謝老婆照顧我無微不至。你煮既飯係世上最好味既，煲既湯亦係最溫暖既。老婆，多謝你，我愛你 ❤️2022年 2月 22號（初22）星期2 2:22分」。

身為妹妹的姜麗文亦好戥哥哥開心，但疫情關係未能親身見證簽紙一刻，她今日回覆本報謂：「梗係好開心啦!!!! ❤️❤️❤️ 雖然因為疫情大家都未可以搞到個婚禮，但係就算喺video call嗰度睇住佢哋簽紙都覺得好感動！忍唔住喺錄影廠喊出嚟 haha。」