古天后日誌｜內外利淡因素夾擊 港股再考驗支持

2月22日，密雲有雨，稍後雨勢頗為頻密，天氣仍然寒冷。隔晚美股假期，但俄羅斯總統普京宣布承認烏克蘭東部兩親俄地區的獨立地位，歐盟批評斥違國際法，美國總統拜登將盡快簽署行政命令，禁止美國公民與頓涅茨克及盧甘斯克地區嘅新投資、貿易及金融往來。俄國嘅舉動被視為向烏克蘭宣戰，引起金融市場震盪，道指期貨急挫，港股今日預O左要低開。

俄烏局勢愈見緊張，金價跟油價齊齊上升，市場憂慮俄羅斯原油供應受阻，刺激國際油價周一(21日)急升。布蘭特4月期油收報每桶95.39交元，升1.85美元或1.98%；紐約期油於電子交易時段升2.88美元或3.16%，報每桶93.95美元。近期資金流動反映避險情緒持續升溫，加上喺加息預期衝擊之下，未來6個月內出現經濟衰退可能性正增加。

除O左外圍地緣政治局勢緊張，港股本身又再度受累內地監管問題影響，重磅科技股再度走弱。繼上周五內地出台新政促外賣平台降費，觸發美團(03690)股價單日大冧近15%後，市場憂慮新一輪監管陸又嚟料，噚日更傳出今年內官方恐繼續凍結遊戲版號審批，拖累港股遊戲相關板塊急挫。

內媒周一引述消息指，農曆新年前已知悉中央繼續加強防止青少年沉迷嘅監管行動，不允許出現「廢土」（以核彈、生化危機等環境受嚴重破壞題材）、「娘化男性」（男性裝扮女性化）、美化日本軍國主義等題材。事實上，去年7月至今，內地已近7個月未有新遊戲獲批版號。睇嚟之前各大行相繼出報告表示，預期內地對科網企業監管已告一段落，只係投資市場一廂情願。

暫時港股嘅關鍵係23500，當然失守多條移動平均線已反映市底再次轉弱，不過恒指仍然企喺23500之上，未必會展開另一個跌浪，暫時仍然保持區間上落，上落區間大約係23500至24800。暫時喺外圍地緣局勢動盪，再加內地監管風再刮起下，港股再考驗23500支持，暫時都係少做少錯，唔做唔錯。

古天后

(徐狄怡，證監會持牌人)