独家丨KB望疫情帮观众放松 同Alina 浩南颖琳玩爆香港
2022-02-10 22:30 
KB（Kevin Boy）最近拍住Alina（李炘颐）、浩南（郑伊琪）和旗下艺人颖琳（刘颖琳）主持ViuTV节目《玩X爆香港地》，疫情下大家冇得飞去外地旅游，于是透过节目介绍香港好玩地方。KB今次仲专登安排观众参与拍摄做团友，希望在镜头前后的观众，都可以在疫情下一齐玩，一齐放松一吓。采访：杜杜 摄影：沈健程
讲到搵3位新拍档一齐玩，KB话最熟是Alina，两人经常在Gym房碰面，「未识佢前观众会觉得佢黑面，个人麻麻哋，其实佢个人好好，想畀大家见到佢最真一面；而喺公司见到浩南，呢个小妹妹唔怕丑，一轮嘴咁讲嘢，搵佢拍节目应该冇闷场；而颖琳就系因为ViuTV节目太高质，想试吓啲冇咁高质，所以就搵咗颖琳帮手。」
拍节目必自肥
今次节目KB减少了整蛊人，原来他收Order做嘢，「今次公司畀咗个Order我，希望见到唔同嘅KB，唔再系整蛊同ＸGames嗰啲。」至于每集邀请当区街坊做团友，KB就解释，「可以畀到香港人或者啲团友放松一日，玩之馀，仲可以睇到平时拍节目系点样嘅一回事，香港近两年咁大压力，希望佢哋可以轻松一日。」KB坦承自己都有得着，「自己多咗了解自己，了解多咗香港呢个地方，希望节目令香港人更加欣赏呢个地方。」
KB承认每次拍节目都有自肥项目，譬如今次就试了扒龙舟及到麻雀馆打麻雀，至于Alina和颖琳就最难忘首次去露营，Alina更因而爱上，「体验咗一晚露营会爱上，同埋喺香港好幸福，要山有山要海有海，而全部嘢一个钟度可以去到，同埋自己跨出咗一步，同啲唔系好熟嘅人，倾到多啲深入嘅嘢，我系个好慢热嘅人，好多时一班人会坐埋一边听，今次要赞吓自己，好似开咗少少个心。」颖琳露营时太冻唔够衫，获团友借衫好温暖，「好开心同啲团友好似朋友咁一齐玩。」而浩南最难忘是去探灵，「我会睇呢啲节目，但日头先敢睇，今次夜晚去探灵，亲身去Feel成件事，真系好惊。」
立即下载 | 全新《星岛头条》APP :https://bit.ly/3yLrgYZ
最新回应