專題｜吳偉權轉戰兩餸飯 CEO掌廚領「權發」再出擊

本月初大爆疫，港府再禁晚市堂食重創飲食業，但油麻地兩餸飯專門店權發小廚，天天由早到晚都有市民排隊光顧，網上更瘋傳晚市的兩層人龍照片，成為逆市奇葩。老闆兼大廚吳偉權，曾是坐擁十一家權發海鮮酒家的CEO，受疫情拖累酒樓全綫結業。去年十月，他轉戰兩餸飯，每日摩打手般拋鑊爆炒，無間斷供應鑊氣小菜。三十五年前，吳偉權創業開設第一家權發，現時彷彿回到起點，雄心猶在的他再踏人生擂台，坦言「今次真係最後一擊」。新年將至，他寄語香港人，「只要肯做肯捱，絕處都會逢生」，盼一起走出疫下困境。 記者 關英傑 攝影 梁譽東

採訪當晚，吳偉權剛炒完最後一個餸，默默坐在餐廳一角，略現疲態。油麻地權發小廚是去年十月底開業，店在義順牛奶舊址，過去三個月，吳偉權由早到晚坐鎮熱廚房，每朝十時開工，便炒個不停，生炒骨、西芹帶子蝦球……密密送到前台。

熱騰騰餸菜不停送出，香味四溢，輪候買飯盒的市民都引頸觀看，確收宣傳之效。中午時分，人龍二十米，廚師出身的他雖感滿足，但坦言「已經三個月無放假，真係非人生活，呢啲辛苦錢嚟」。他指，最後一個餸通常九時半完成，才可步出廚房稍作休息，但未幾他又提示子女訂購薑、葱、蒜頭等材料，又打點醃肉添汁，準備翌日的飯市。

手瓜起腱 全日炒不停

他指，禁堂食令下生意增加三成，亦忙個不停，連之前下午的半小時休息時間都沒有。連日旁觀所見，他左手拿鑊、右手握鑊鏟，不停拋炒，「炒小菜要熱力均勻，一定要拋炒，至夠鑊氣好食，用鑊鏟始終傳熱慢啲」。他說，「平均三分鐘炒一盤，用超越酒樓級數去做，即炒即做」，說罷哈哈大笑。

開業三個月，他指全日客路各有不同，除固定熟客必買一客兩餸飯，或單買一兩個餸回家，中午主打寫字樓客、果欄工友；晚市亦有下班族買幾個餸回家，「有客人話買幾個餸，返屋企煮個飯就食得，省時又方便。」至今累積一批熟客，訪問當日，熟客送來一個巨臂招財貓擺設，手瓜起腱的他落場休息時，拿在手中愛不釋手，笑言街坊讚賞一句「好食」，感覺有人賞識廚藝，做廚師心滿意足。

權發海鮮酒家最後一家柴灣分店於去年七月結業，油麻地權發小廚是吳偉權與友人合資經營，賣兩餸飯亦設堂食，西灣河另有一家只賣外賣兩餸飯的權發小廚，則由友人主理。由海鮮酒家到小廚、由CEO到小店老闆兼大廚，吳偉權指中式小炒最重要是質素，當年開設第一家權發海鮮酒家亦是他親自掌廚，打出名堂，如今再出發，對廚藝充滿信心的他選擇再執鑊鏟，希望再建事業，「自己就是出品同信心保證，回頭客就是證明。」

擴張過急 酒樓集團倒閉

吳偉權性格豪爽，問到當年失敗原因，他直言「我比較進取，不甘於現狀，想不斷衝刺，所以出事」，回想當年「開十一家想谷上市，但谷唔到。」可是「擴張太快，人手接不到，我們賣小菜，單價低，當時錢雖然搵到，但不懂理財，加上疫情影響。」酒樓集團終如骨牌倒下，欠債千萬。

○八年時，正值事業高峰期，吳偉權每晚巡鋪，籌劃發展大計，當時他利用空閒時間學習泰拳，又參加泰拳比賽，與摩根士丹利香港交易部門的外籍總經理打擂台，最終敗下陣來。

人生有起有跌，如今他轉戰兩餸飯市場，坦言「今次真係最後一擊」，對開業三個月的成績他感到滿意，自問「由細到大，我都係一個刻苦耐勞嘅勤力人，奈何人生要講命、講際遇，但冇理由就咁玩完。」

自小勤力與弟拍住上

經一事長一智，他指現時「要看看怎樣維持出品質素，才可以再開（分店），冇品質冇得搞。」重提權發創業史，他興致勃勃，憶述十七歲時開設快餐店，「當時咩都唔識，睇住師傅點做，最後蝕本收場，當交學費」。兩年後，他與二弟在西營盤第三街開設第一家權發，「好細間，只得幾張枱，二弟炒餸亦好叻，兩兄弟拍住上」，那是一九八七年的事。

「之後在西環開第二家，東大街、柴灣、北角……青衣分店則好後期」。他指，現時經營飲食業十分艱難，租金、食材、人工都貴，樓面、廚房、清潔幾十人，兩年前疫情來襲，更加速衰敗。

回首半生，他說「我細細個就好勤力，發現紙皮賣到錢，就喺街頭執紙皮去賣，又賣生果，爸爸在街市賣魚，好辛苦，雖然兩餐不成問題，但八、九歲已幫手送貨，又幫手切野」。至於權發名字由來，原來出自吳爸爸手筆，「佢話『你叫阿權，又想發達，就叫權發啦。』我確係好想發達，有錢搵，我可以唔使瞓。現時都咁搏，當年後生更緊要」。

兩餸飯未來或有淘汰賽

他說，兩餸飯其實不是近年產物，亦抗拒被視為窮人恩物，直言兩餸飯亦可以講質素，因為九八年時他已在酒樓兼賣即炒兩餸飯，成功吸引一批收工後購買「師奶餸」的主婦，到○三年沙士襲港，西灣河權發海鮮酒家亦靠賣三十五元的兩餸飯捱過疫症難關，可是新冠肺炎這役，權發卻撐不過。

提到兩餸飯，他指現時遍地開花，擔心未來會出現一場淘汰賽。由權發小廚再出發，吳偉權自嘲「仍未死得」，但深信「做人最緊要勤力，勤力已經贏咗七成，我咁勤力搞到咁樣，是運氣問題。」現時他每月仍要還債，自言仍有衝勁，會繼續拚搏，絕對有信心可以重建事業，但今次會站穩陣腳才繼續發展。他指，疫下人人不好過，新年願望是「人人有工開，個個有飯食」，最重要是可以趁農曆新年，放假休息。

《星島日報》

立即下載 | 全新《星島頭條》APP : https://bit.ly/3yLrgYZ