梁詠琪與Edan演母子勁冧君如女收百元利是客串一秒鏡頭

2022-01-27 00:30

吳君如監製兼自演賀歲電影《闔家辣》，以搞笑形式帶出香港疫情下真實家庭故事，找來好友鄭中基及首邀梁詠琪（Gigi）合作，還有影壇新貴呂爵安（Edan）參演。戲中Gigi與Edan演母子，突然成為廿幾歲仔之母，她說：「君如驚我過唔到呢個關口，所以親自出嚟畀劇本我，等我冇得推，唔係君如提我都冇諗，其實計吓數生得出。」君如指從未見過演員如些爽快答應，又欣賞Gigi夠自然美。

文：卓寶花攝：鄧國良、錢文坤

Edan同Gigi演母子，起初君如都擔心Gigi會接受唔到。

Gigi今次角色既是媽媽又是一家之主，有個廢老公，夫妻相處經常拗撬，相反現實中各自對另一半都很溫柔，而君如則屬現實版一家之主，她笑言：「由細到大我都問阿女，屋企邊個係Boss？佢指住我話You。我唔使做一家之主，但有啲嘢自自然然就要決定，每個人諗法唔同，價值觀唔同，好多事始終要做決定，我就做咗呢個位，因為我係媽媽。」戲中君如飾演隨和大姑奶，不乏接受檢疫及進入隔離營場面，寫實貼地。

Gigi話聽到Edan叫佢做媽媽都好冧！

君如現實中都係一家之主。

幾位前輩首次和Edan合作讚不絕口，投入得似一家人，Gigi說：「Edan一遠處就叫媽咪，好冧！我諗全香港媽咪都好想Edan嗌佢媽咪，啲fans都話好想做佢媽咪。」劇組最緊張Edan一場喊戲，君如知道他在MIRROR 12子中，覺得Edan很理性，做演員會蝕底，應該要投入忘我，還大爆：「試鏡時佢想推，就係話有場戲要喊，佢驚喊唔到好大壓力，最後都成功發揮，肯定勁過其餘11個，我哋過晒啲武功俾佢。」並激讚Edan為人真誠，有自信又謙虛。