獨家丨陳美齡大讚MIRROR跳舞夠出色 支持年青音樂人

去年9月陳美齡（Agnes）為咗香港兩場《美麗人生半世紀演唱會》而推出咗廣東新歌《櫻花說》，由於30幾年冇唱廣東歌，對Agnes來說既新鮮又有挑戰性，而且交由年輕人製作歌曲MV及設計形象，令她煥然一新，所以Agnes都好欣賞年輕音樂人，特別係MIRROR嘅舞蹈。採訪：方騫平 攝影：沈健程 場地：中原薈

陳美齡屹立樂壇50年，永不言休。

 

本月她會喺日本舉行出道50周年演唱會。

由陳美齡親自作曲，分別有廣東版本《櫻花說》，至於國語版本《透明的花瓣》仲包辦埋作詞，而歌曲係講掛念前度，要對住櫻花講心事。Agnes指她和二仔昇平一樣較癡情，還爆二仔甩咗拖幾個月都放唔低前度：「佢唔會同我分享感情事，希望佢快啲搵到第二個啦，佢咁浪漫又算靚仔，其實好多朋友話有好嘢介紹，如果佢肯返嚟香港發展就搞掂喇。」

廣東新歌《櫻花說》的MV形象好年青。

 

《櫻花說》係講癡情男女，是她及二仔昇平的心聲。

 

要畀空間新一代發展

之前陳美齡去咗美國一個月探望3個兒子及大仔媳婦，除咗食餃子及舉行做批大賽外，一家人齊齊倒數過年，非常開心，她又指囝囝猛讚《櫻花說》好聽：「今次交由年輕人操刀拍MV好有創意，最特別係Push我走出安全區，除咗戴帽仲會改着長褲同波鞋。」因此，Agnes好支持年青人：「雖然MIRROR嘅歌同我欣賞嘅歌有少少唔同，但見到facebook彈出嚟嘅演出片段，佢哋跳舞好齊好叻，啲衫又新潮，都開心見到香港有隊夠水準嘅組合。」問她可會擔心樂壇被年輕一代玩晒時？Agnes即大方道：「成個世界都係咁，我哋唱畀咁上下年齡嘅觀眾聽，而且乜嘢都試過唔好同佢哋爭，要畀空間佢哋發展，要睇得長遠啲否則邊會有進步？」

Agnes大讚MIRROR跳舞出色。

 

大仔和平及媳婦、二仔昇平和細仔協平陪她遊美國環球影城。

 

由美國返抵日本嘅陳美齡正在隔離中。

 

美國探仔期間跟兒媳舉行「做批大賽」，請來朋友做評判，她所做的芝士奶酸批只得殿軍。

立即下載 | 全新《星島頭條》APP : https://bit.ly/3yLrgYZ