独家丨陈美龄大赞MIRROR跳舞够出色 支持年青音乐人

去年9月陈美龄（Agnes）为咗香港两场《美丽人生半世纪演唱会》而推出咗广东新歌《樱花说》，由于30几年冇唱广东歌，对Agnes来说既新鲜又有挑战性，而且交由年轻人制作歌曲MV及设计形象，令她焕然一新，所以Agnes都好欣赏年轻音乐人，特别系MIRROR嘅舞蹈。采访：方骞平 摄影：沈健程 场地：中原荟

陈美龄屹立乐坛50年，永不言休。

 

本月她会喺日本举行出道50周年演唱会。

由陈美龄亲自作曲，分别有广东版本《樱花说》，至于国语版本《透明的花瓣》仲包办埋作词，而歌曲系讲挂念前度，要对住樱花讲心事。Agnes指她和二仔升平一样较痴情，还爆二仔甩咗拖几个月都放唔低前度：「佢唔会同我分享感情事，希望佢快啲搵到第二个啦，佢咁浪漫又算靓仔，其实好多朋友话有好嘢介绍，如果佢肯返嚟香港发展就搞掂喇。」

广东新歌《樱花说》的MV形象好年青。

 

《樱花说》系讲痴情男女，是她及二仔升平的心声。

 

要畀空间新一代发展

之前陈美龄去咗美国一个月探望3个儿子及大仔媳妇，除咗食饺子及举行做批大赛外，一家人齐齐倒数过年，非常开心，她又指囝囝猛赞《樱花说》好听：「今次交由年轻人操刀拍MV好有创意，最特别系Push我走出安全区，除咗戴帽仲会改着长裤同波鞋。」因此，Agnes好支持年青人：「虽然MIRROR嘅歌同我欣赏嘅歌有少少唔同，但见到facebook弹出嚟嘅演出片段，佢哋跳舞好齐好叻，啲衫又新潮，都开心见到香港有队够水准嘅组合。」问她可会担心乐坛被年轻一代玩晒时？Agnes即大方道：「成个世界都系咁，我哋唱畀咁上下年龄嘅观众听，而且乜嘢都试过唔好同佢哋争，要畀空间佢哋发展，要睇得长远啲否则边会有进步？」

Agnes大赞MIRROR跳舞出色。

 

大仔和平及媳妇、二仔升平和细仔协平陪她游美国环球影城。

 

由美国返抵日本嘅陈美龄正在隔离中。

 

美国探仔期间跟儿媳举行「做批大赛」，请来朋友做评判，她所做的芝士奶酸批只得殿军。

立即下载 | 全新《星岛头条》APP : https://bit.ly/3yLrgYZ