吳肇軒餵街貓餵出感情 想收編發現剪耳Hold住先

呢期睇ViuTV成日見到吳肇軒，因為佢同凌文龍、游學修及陳湛文輪住主持節目《演員‧門》。吳肇軒本身有兩隻狗狗黑啤和豬皮，之前受訪提到兩隻夠晒數，因為好驚佢哋離世會好傷心，但緣份就係咁奇妙。

吳肇軒首做主持反應唔錯。

吳肇軒本身有兩隻狗。

吳肇軒見到隻好得意嘅啡色街貓，因為貓貓跟住佢，所以就忍唔住買罐罐餵佢，愈餵隻貓就愈黐佢，需知道喵星人都好蠱惑，搞到吳肇軒都好想帶佢返屋企，但發現佢剪咗耳，覺得應該有人照顧緊佢而打消念頭。不過出Po後，好多貓友都留言告知，剪耳只係代表隻貓貓係絕咗育，希望佢可以令貓貓有個家，由於群情洶湧，吳肇軒即表示，「大家唔好咁緊張，等我呢幾日了解下佢個情況先，朋友話，多數義工帶咗佢去絕育之後放返出嚟，係代表嗰區應該有人會負責佢。」咁貓貓有家當然好過流浪啦。

成日餵貓貓。

個眼神好似叫吳肇軒帶佢返屋企咁。

 

立即下載 | 全新《星島頭條》APP : https://bit.ly/3yLrgYZ