獨家│《造星IV》Day自爆有7個韓國男朋友 受影響恨入女團
2021-12-24 22:51 
《全民造星IV》91號Day（許軼），成功打入最後20強，晉身明晚（25日）舉行的總決賽。曾到韓國做過半年練習生的Day，原來當日除了疫情，還因學業及經濟等問題要決定放棄留韓追夢，幸好有今次比較延續夢想。不過，鍾情韓仔的Day，更自爆同時有7個韓國男朋友，直言夢想入女團也是受他們影響。採訪：杜杜、秦詠姿 攝影：葉君海、譚壹致
19歲的Day在面試時已被留意，除了因眼大大得意外形，一句自稱「香港Jennie mix Lisa」，即時引起花姐和觀眾反應，重提這句話她承認後悔口出狂言，「我講笑咋！因為我係好鍾意佢哋，所以先至咁樣講。其實我講完都即刻唔開心，因為導演跟住問我驚唔驚咁講畀人話唔似，Oh My God！真係唔應該咁講，嗰時係第一次casting，我冇諗過係拍緊節目，有可能每一句都會播出街，會畀人講，畀人評論，嗰時有啲後悔，但都講咗唯有接受，以後講嘢都會小心。」
因BTS想做女團
雖然話過自己似出名靚女的BLACKPINK成員Jennie和Lisa，但Day又自謙唔覺自己靚，「唔可以話樣衰嘅，自己睇自己總係覺得唔靚，最有信心得個鼻，其他嘢都麻麻哋。」她更強調雖然拍過拖，但追求者唔算多，「我好摺㗎！唔係好同男仔講嘢，都係女仔friend比較多。」不過她自爆在韓國竟然同時間有7個男朋友之多，但並非做練習生時認識，「嗰陣時係同外界零接觸，成班女仔係咁日練夜練。我好鍾意BTS（防彈少年團），成隊都鍾意，所以我有7個男朋友，嗰時都有諗住去嗰度搵佢哋，但咁啱佢哋嗰時喺韓國冇乜活動。」Day承認4、5年前成為BTS粉絲，亦激勵了她加入女團的決心，「希望好似佢哋咁樣發光，見到佢哋好努力，同埋好有團魂，都好羡慕佢哋，好想好似佢哋咁做女團。」
靠返兼職撐追夢
不過Day到韓國追夢僅維㭙半年，除了受疫情影響，還因學業和經濟問題，「雖然嗰度係包食住包訓練，但係有好多嘢都係要自己畀錢，譬如交通費，如果3年唔讀書冇收入負唔負擔到呢！？我最後都係揀讀書，雖然追夢係好，但都會諗現實狀況，競爭好大，唔係好多人可以成功出道，考慮咗好多因素選擇咗放棄。」雖然家人一直很支持Day追夢，但身為獨女的她亦不想成為家庭負擔，「屋企都好支持，只係要我對自己選擇負責任，會話你唔掂就同我講，或者會問我夠唔夠錢使，但係我都會同佢哋講OK，我都過咗18歲唔好意思開口問屋企人攞錢，所以呢幾年嘅生活費，都係靠返partime，我做過好多行，餐廳同派傳單都做過。」
認基本功未夠好
有過韓國做練習生經驗的Day，參賽期間雖然偶有失準表現，但尚算不斷進步，加上討好外形可塑性高，仍成為總決賽熱門人選，「大熱又唔係好覺得，因為都有好多個都話係大熱，好似Marf都話係大熱，觀眾嘅期望會更加高，不過對我嚟講都係好事嚟，人哋對我期望高，自己都要做好啲，係會有壓力，但我個人比較懶，係要有啲壓力推動我去做先得。」對於表現失準，她承認仲有好多進步空間，「喺韓國做練習生都成日畀人鬧，跳舞同唱歌都唔夠好，雖然都有繼續學跳舞，但都係高中先至開始跳舞，所以比起啲細細個跳舞嘅人，我嘅基本功真係麻麻哋，所以仲有好大段路繼續努力。」
最新回應