古天后日誌｜12月餘下時間港股亦難有起色

12月21日，多雲，天氣清涼，有幾陣雨，最高氣溫不足20度，冬至呢O的天氣都正常。隔晚美股繼續插水，除O左因為變種病毒全球擴散，市場憂慮疫情拖累經濟復甦。與此同時，美國拜登政府嘅投資法案或未能獲通過，掌握「重建美好未來」法案關鍵票的民主黨參議員曼希上周日(19日)表明不會支持法案，高盛表示法案若未能通過，下調GDP預測。美股三大指數顯著下跌，道指盤中更跌近700點，收市跌433點；標指跌52點；納指跌188點。

雖然變種病毒來勢洶洶，不過美國藥廠莫德納(Moderna)宣布，其核糖核酸(mRNA)技術的新冠疫苗第三劑加強劑，能提供重大防禦力，對抗Omicron變種病毒，同業輝瑞藥廠(Pfizer)、BioNTech嘅疫苗加強劑，對付亦有一定防禦力。對於變種病毒，古天后認為市場有少少過份擔憂，又或者係美股本來已需要調整，正好用Omicron擴散呢個理由砌低大市。

正常美國聯儲局由鴿轉鷹之際，內地為救實體經濟，中國人民銀行20個月再次降息，將一年期貸款市場報價利率(LPR)下調0.05厘至3.8厘，可惜無助中港股市走勢，噚日兩地股市仍然受壓。港股失守23000後再穿底，並創下超過18個月低位。

內地接連放水，但港股無動於衷，依然疫不能興，主要係內地呢次減息示意政策偏向寬鬆，惟實際影響將相當有限，。因為問題根源在於來季冬奧會帶來嘅供給衝擊、「清零」防疫策略令成本上升、出口增長放緩，以及房地產行業惡化，惟人行保持5年期LPR不變，表明中央目前無意提振內房。而內房債務問題一直未能解決，令支撐經濟一大支柱失效。

而中美貨幣政策明年將明顯分化，聯儲局美國着手將利率從近零水平上調，以遏制強勁通脹，反觀內地則加大「放水」力度，支撐因調控內房而受壓嘅經濟。恐導致流入內地的資金減少。中資股去向相當視乎美國遏制資金流向中國嘅力度有幾大，魚缸缺水，表現自然強差人意。

港股「弱過藥煲」嘅另一原因，固然係監管消息接踵而來。官媒再刊文稱要遏止資本無序擴張，要設置「紅綠燈」作規範和引導，依法加強對資本的有效監管，防止資本野蠻生長。一系列「強監管」政策令中資科技股走勢每況愈下。

暫時港股似乎難有起色，而年度嘅粉飾櫥窗活動亦未見實行，睇嚟港股喺12月 餘下時間都係半生不死，唔使有乜嘢期望，唯有等新一年開局，明年會更好。

古天后

(徐狄怡，證監會持牌人)