獨家丨陳敏之商場齋行零購物癮 同男友人食Tea係咁講
2021-12-17 01:30 
42歲的陳敏之唔多劇拍，但就有好多拍綜藝嘅機會，好似TVB遊戲節目《麻雀鬥室三決一》佢都有份。日前下午，陳敏之約咗年齡細佢一大截嘅男友人去又一城食Tea，可能做開綜藝，又有自己嘅YouTube頻道，好鍾意講嘢嘅敏之全程負責講，埋單離開仲好熱情咁搭住男方膊頭一齊行。 採訪:譚壹致
而家做藝人唔怕冇曝光機會，因為有大量社交平台，做吓LIVE，開個YouTube頻道，做KOL搵錢話咁易，係睇吓有冇人睇嘅啫。陳敏之都有開YT，每集請一個星級嘉賓吹吓水， 通常分上下集，見佢開咗兩個月上載9段片，都叫勤力㗎嘞。
講嘢手口並用
日前下午，陳敏之約咗年青男友人去又一城食泰式Tea，極速食完後兩人係咁傾，正確啲講係女方係咁講嘢畀男方聽，吹完水埋單，離開時敏之搭住男方膊頭慢慢行，之後又左指右指示意將會行去邊，最後仲張開雙手動作多多。變單拖嘅敏之邊行邊同人語音短訊聯絡，其間行咗Zara Home、玩具反斗城、睇飾物同埋去咗無印兜個圈，無論家品定玩具，全程得個睇字，遊足一個鐘先去停車場駕車離開。
最新回應