MIRROR預告明年合體開騷 AK演唱感觸爆喊
2021-12-09 13:44 
MIRROR其中六子姜濤、江𤒹生（Anson Kong）、盧瀚霆（Anson Lo）、柳應廷（Jer）、呂爵安（Edan）及陳卓賢（Ian），昨晚（8日）終在灣仔完成一連兩場音樂會，經頭場熱身後，六子明顯更放盡演出，尾場氣氛更加高漲。AK繼續以快歌打頭陣，再與姜濤鬥舞演出《Coming Home 》。及後AK單人獻唱周國賢《Children Song 》時，歌詞大意說出每個成人想做回純真而又簡單的自己，AK唱到尾聲時突感觸爆喊，在旁為他彈結他伴奏的天衡和Jason即拍膊安慰。完騷後AK在社交平台留言：「對唔住，大家冇忍住，最衰都係周天衡，我以為佢喊，落台先知佢唔夠瞓，隻眼紅晒，THANK YOU VERY MUCH，多謝兩位兄弟陪住我完成呢兩首歌，你哋喺隔離好溫暖。」
整晚其中一個高潮依然是在Edan與Anson Lo這對「大叔CP」身上，又唱又Rap演出《So Bad》，接着Anson Lo再以串燒快歌辣㷫全場。另Edan獻唱《My Apple Pie》時，見到「正印」阮小儀在台下興奮舉機影相，被大會攝入鏡頭之中。及後姜濤再次演出第九胎《鏡中鏡》，及獻唱經典歌曲《浪子心聲》、《分分鐘需要你》等向前輩歌手致敬，他說：「要講嘅說話噚晚都講晒，用以下首歌將我所有想講嘅講畀大家聽。」之後唱出《夕陽之歌》，台下觀眾以歡呼和應。最後六子與觀眾大合唱《我的快樂時代》結尾，AK向歌迷承諾下次12人見，意味明年MIRROR再合體開騷。
最新回應