梅艷芳姨甥多謝姨姨留下教育基金 預告會返港見婆婆

電影《梅艷芳》上映以來叫好又叫座，與梅艷芳失聯21年的梅愛芳長子潘文皓亦有留意電影，日前被發現在Facebook表示自己看了《梅艷芳》三次，並在帖文中抒發了感受。港台節目《舊日的足跡》主持車淑梅，日前成功透過長途電話專訪身在加拿大的文皓，足本對話如下：

潘文皓：「係嘅，我睇咗三次，第一次嘅感覺難以形容，長期處於想流淚同流緊淚嘅狀態，再睇第二次、第三次都有唔同嘅感覺，有好多地方好感動。當見到媽咪同姨姨喺舞台表演嘅時候，我眼淚不禁流落嚟，我可以親眼見到佢兩個寶貴嘅姊妹情，我細個嗰時見唔到嘅......媽咪走嘅時候我七歲，姨姨走嘅時候我11歲，我唔喺佢身邊。有日，我同王丹妮通電話，當時佢喺香港嘅戲院謝票，透過視像講咗幾句，佢戴上口罩眼神好似（姨姨），嗰陣時我好感動，有機會真係想同佢傾多幾句。」

淑梅姐：「你係咪一直喺溫哥華？」

潘文皓：「 其實六年級開始就喺呢邊生活喇！當我知道有呢套電影，我一定要睇，裡面一定會講好多有關媽咪同姨姨嘅事，爹哋、細佬都有睇......印象中，媽咪（梅愛芳）係一個好稱職嘅媽咪，好畀心機教我同細佬，腦海裡邊好難想到一個畫面佢鬧過我哋。佢係一個好積極樂觀嘅人，遇到乜嘢難題都係笑住面對，正如電影情節一樣。姨姨係一個好直、好有為、好堅強嘅人，佢好鍾意講笑令身邊人開心，時時刻刻為人哋設想。細個嗰時我有少少驚佢，因為佢把聲好有力量同埋威嚴，有冇俾佢鬧過我唔記得，但係我真係有少少驚佢，我知道佢係大明星，佢係個永不放棄嘅人，電影中佢話『只要有信心、世上無難事！』呢一句正正喺佢生命話畀我哋聽。」

淑梅姐：「你知道姨姨一直搵你哋嗎？」

潘文皓：「 我只係呢一排先知道......當年我哋唔喺香港，唔知佢搵我哋，如果知道，爹哋一定會帶我同細佬返嚟見佢，所以當我知道佢一直有心搵我哋，亦係佢臨終前一個心願，我真係覺得好難過。我而家大個咗，可以幫佢完成心願，即係佢可以搵番我哋喇！其實呢兩三年，我有同姨姨嘅fans 聯繫返先至知道有呢套電影，我先至知道有呢一件事，係佢哋話畀我知......」

淑梅姐：「你哋嘅近況如何？」

潘文皓：「我28歲，有女朋友，未結婚，我而家做IT工作。細佬都好好，佢都係做IT電影後期嘅工作。爹哋好好，身體好好，好健康。我都想返香港，如果可以，我嚟緊呢半年內會返，上次2017年返過嚟，今次我會探婆婆，佢98歲，我好想返去見佢。」

淑梅姐：「身為媽咪同姨姨嘅新一代有咩感覺？」

潘文皓：「其實當我知道今次有咁多人仲係掛住佢哋，我好感動。做媽咪嘅仔、姨姨嘅姨甥有種壓力，我好想好似佢哋咁樣，好想學識佢哋嗰種生活態度、處事方式，因為我覺得佢哋好堅強、好樂觀積極！」

淑梅姐：「你喺Facebook嘅中文寫得好好，有咩原因呢？」

潘文皓：「我一直喺溫哥華生活都有睇TVB，因為有字幕，所以我記得。我聽日會睇（《梅艷芳》）第四次，隔幾日睇一次，直到落畫，因為每一次都有唔同感受。我覺得Fish（廖子妤）好似我媽咪，特別佢短頭髮嘅時候，我好多時會睇返以前啲相。三次睇都流眼淚嘅就係見到姨姨探媽咪，媽咪病床上有張相見到我同細佬，佢望住話唔知可唔可以睇住我哋長大，就係呢一句，我聽到好難過......好遺憾佢唔可以睇到我哋長大，但，我想同媽咪講，佢喺天上一直看顧住我同細佬，所以我哋唔可以做一啲令佢失望嘅事，我會好好咁生活落去。

姨姨佢嗰種精神，將所有精神同時間貢獻畀歌迷、音樂、舞台......遺憾佢冇結婚，最終嫁咗畀舞台同大家，佢呢個態度好值得大家敬佩！我希望佢知道而家仲有好多人繼續愛佢，掛念佢。我要同電影團隊講，我好多謝佢哋，呢段時間到處都有疫情，要為大家打氣，電影帶出咗呢種正能量同態度，值得我哋學習，好多謝佢哋！」

淑梅姐：「有咩要對媽咪同姨姨承諾？」

潘文皓：「就係我要好好成長，好似佢哋咁對自己同對身邊嘅人......姨姨講過希望有一晚，大家食完飯出去望住星星嘅時候，會記得佢，一個曾經為我哋帶來小小歡樂嘅朋友，會記住佢個名叫做梅艷芳，我會一路一路記住佢哋，永遠永遠以佢哋為榮！」

文皓於專訪末更特別補充：「其實我都想講我同細佬好想多謝姨姨留畀我哋嘅教學基金，等我哋可以順順利利咁讀完大學，而家又一分幾好嘅工作。」