陳凱詠開騷防甩裙打算加把鎖 沈殷怡演第三者全賴背稿叻奪角色

陳凱詠（Jace）和沈殷怡（Shirley）今日出席活動，Jace將於本月11及12日開騷，她笑言還有好多事情未處理，不過團隊已經專注協調，更大賣關子屆時會有一個全新從未表演過的才能，再融合舞蹈。歌衫方面，Jace今晚會首次試身，由於早前開騷曾發生「甩裙」事件，她笑言今次會加上扣或加鎖：「我又貪心想每part換吓衫，所以要試清楚真啲，換得快又除得快，唔使拎晒鎖匙。」她透露會有幾位嘉賓，但不想只是上台唱歌，希望與嘉賓會有更多交流。

此外，首次入圍「叱咤樂壇我最喜愛的女歌手」最後5強，Jace說：「黐線㗎！完全無諗過，我覺得意義好大，因為作為歌手會有很多『聲音』，可能有人不喜歡我，但突然打咗強心針，好多人鍾意同支持自己，係感動嘅！能夠入頭5位已當自己贏。」

同場的沈殷怡有份參演葉念琛執導的英皇電影《分手專家》，她表示戲中演第三者「琪琪」，自爆獲得角色的原因，原來導演睇過其去年在巡禮擔任主持，她說：「佢話覺得我背稿好叻，咁就啱晒啦，因為呢個角色有兩頁稿對白，原來呢啲都係才華。」她坦言希望將來可以繼續參演電影，本身亦有上堂學演戲，而明年會拍以親情為題材的劇集。