獨家│BabyJohn陪老婆行街孭晒戰利品 持家有道Keep單慳泊車錢

蔡瀚億（BabyJohn）同梁祖堯、陳俞希（Hailey）主持ViuTV節目《晚吹- 空肚講宵夜》勁有火花，令佢哋成功入晒屋。早前仲添食拍埋《宵夜燒到過埋夜》，播出同樣大獲好評。不過BabyJohn本業始終係演員，最想當然係拍電影，但疫情打亂晒啲電影開拍計劃。雖然錢係搵少咗，但反而多咗時間陪屋企人。日前BabyJohn趁得閒，化身愛妻號陪老婆行街，買完嘢都Keep返啲單慳返泊車錢。採訪:譚壹致

BabyJohn同老婆結婚8年，甚少公開放閃。日前兩公婆同朋友行商場，蔡太同女友人雞啄唔斷，BabyJohn就做跟得老公，啲環保袋拎到一抽二掕都冇怨言。行到一半BabyJohn單拖去詢問處問嘢，再會合返老婆同朋友。見BabyJohn途中都有拎啲單數吓，唔知係咪未夠數攞泊車優惠，蔡太就惟有買多兩包化妝棉同棉花棒湊數，呢位賢妻喺計數方面好幫得手呀！

一行三人逛到入黑各自離開，BabyJohn去攞車之前再逐張單數吓使咗幾多錢，似係想確保攞到商場泊車優惠，慳返少少當幫補。BabyJohn仲唔使老婆陪自己行到老遠排隊扱泊車飛，叫老婆企定定等佢，最後做埋「柴可夫」，兩公婆齊齊返歸。