邵仲衡拍《梅艷芳》借位打王丹妮 靠爆粗加強現場緊張氣氛

「大佬孝」邵仲衡昨晚（25日）到黃婉曼（Icy）的直播節目「安品生活」做訪問，適逢是感恩節，邵仲衡親自下廚，他的男人廚房示範了日式炸豬扒，Icy食到舔舔脷。
邵仲衡有份演出的電影《梅艷芳》叫好叫座，他在戲中有一幕掌摑扮阿梅的王丹妮，非常入戲，雖然只是借位拍攝，邵仲衡都有營造現場緊張氣氛，他說：「為咗加強效果，我乜嘢魚蝦蟹同器官都爆晒出嚟。」邵仲衡表示有時未必大力打落去的效果一定好，相反最好是對手的表情同反應要配合，才加強戲味。邵仲衡更即場在鏡頭前示範掌摑Icy，借位「兜巴星」，經過邵仲衡指導，Icy學會了當中技巧，她還笑言要打番邵仲衡，不過二人「互片」搞笑成份居多。

邵仲衡過往演過不少劇集和電影，當中《大時代》的丁孝蟹一角最深入民心，Icy好奇問網民喜歡看到邵仲衡嘗試挑戰甚麼角色？網民給了很多建議，有人希望他扮出櫃男，也有人想看他演醫生或魔術師，甚至因看到邵仲衡的耍家廚藝想看到他演照顧小孩的單親爸爸，他都會一一考慮。
此外，邵仲衡在節目尾段也分享了夫妻相處之道，他是十分尊重太太的好老公，他自爆不時下廚冧老婆，邵仲衡說：「我哋之間唔會當面say no，有啲嘢唔好諗起就要講，兩公婆日日對住，可以諗吓下次先講，我哋喺屋企都各自有空間。」