翁靜晶捐出5個名牌手袋拍賣 望籌得200萬善款幫助貧窮小朋友

翁靜晶與丈夫何猷彪經常做善事，早前夫妻檔籌得530萬元，幫助疫情嚴峻的尼泊爾購買抗疫物資，善心爆棚。近日翁靜晶再決定捐出５個愛馬仕手袋拍賣，希望將籌得的善款通過「何東文化發展基金」幫忙在貧窮線上掙扎的小朋友。
翁靜晶拍片上載到個人的facebook專頁，呼籲大家行善最樂，透露拍賣公司亦是義務幫忙，她說：「得到嘅款項係會幫助一啲需要減低經濟壓力嘅小朋友，一直以嚟好多謝何東家族對我嘅愛護同支持，今次都係畀個機會我做番多啲嘢。11月26日請大家多多支持參予。」翁靜晶並寫著：「要達到共同富貴，第一步是共享富貴。」

而翁靜晶捐出的５個手袋，拍賣底價由6萬至26萬港元，當中以鱷魚皮手袋最珍貴，翁靜晶今日接受《頭條娛樂》訪問說：「大約兩個月前開始發起，當初只係放上網賣嚟籌款，估唔到反應好熱烈，好多人私訊話想買，有啲仲畀埋銀行記錄證明自己係真客。但實行方面有好多問題，交收都有一定風險，咁啱同陳百強歌迷會嘅會長傾開，對方係警察，就幫手搵咗一間拍賣公司，唔收佣金幫手，好多謝佢哋，善款可以全數用嚟幫助小朋友，今次條片仲喺我先生幫手拍，希望可以籌到200萬。」她表示全部手袋只用過一、兩次，笑言不適合自己生活模式：「我平時都係去茶餐廳，自己份人又唔夠細心，所以寧願用嚟幫多啲人。」