Patrick Sir為幫朱凱婷買支水 痛失台慶2萬5大利是

TVB《萬千星輝賀台慶》昨晚（19日）在歡欣氣氛下圓滿結束，「六合彩之女」李芷睛獨得38萬元大獎，但不是人人咁好彩，Patrick Sir（林溥來）就因為未能在限時內上台領獎，而失掉2萬5千元大利是。

原來Patrick Sir之所以錯失良機，是因為「太貼心」，為《東張西望》拍檔朱凱婷（Heidi）買水飲，結果就見財化「水」，認真陰公豬。Patrick Sir太太關宛珊今日在IG限時動態上載抽中Patrick Sir領獎一刻片段，但卻見老公遲遲未有上台領獎，她留言：「話說我有預感係抽中佢，拎電話出嚟影，真係佢喎，勁興奮！點知佢冇出現。」仲有一個喊樣Emoji。

Patrick今日接受《頭條娛樂》訪問時，直認當時收到幾十個WhatsApp問：「你喺邊？」，他指朱凱婷突然表示口渴，他即表現男士風度幫手去買水，還說：「我都想行吓！」怎料到便利店買水兼食完燒賣後，經理人致電表示抽中自己，但為時已晚，笑言老婆還WhatsApp問：「去屙屎呀？」不過，Patrick Sir好維護Heidi：「真係唔關Heidi事嘅，係我主動提出幫佢，因為佢着住高踭鞋，唔想佢行咁遠。佢係非常開心，亦都好內疚。」

不過，塞翁失馬焉知非福，Patrick仍覺得好開心，笑說：「今日返公司做《東張》，台前幕後都戥我唔抵，連燒味師傅都斬大碟啲畀我。雖然失去2萬5，但得到好多關懷同愛錫我，仲想特別鳴謝Do姐同叻哥，睇番片，見佢哋好有心幫我拖等我入嚟，佢哋好好呀。」而朱凱婷感到「超無奈」，自言回家後即被老公問起，自言請不起對方食2萬5千元一餐飯，但可以請食2千5百元的晚飯補數。