亞視抽MIRROR水出男神炸雞閃卡 用老臘肉追擊小鮮肉
2021-11-18 19:30 
男團MIRROR人氣高企，連鎖快餐店近日推出閃卡，吸引「鏡粉」係咁狂食炸雞集齊成套。而亞視為咗宣傳亞視手機App及串流平台而抽鏡仔水，突然喺社交平台上載12位「ATV男星限量版閃卡」，用手持炸雞嘅「老臘肉」追擊「小鮮肉」。打響頭炮嘅藝人秦沛、羅樂林、劉永和潘志文，第二炮係陳展鵬、林韋辰、袁文傑，後來仲追加「秦始皇」劉永、盧海鵬等，真係好鬼正，惹來網民熱討。
最搞笑當中羅樂林有英文名「LOKLAM」配合MIRROR隊長Lokman（楊樂文），而秦沛嘅「你大我呀」閃卡款，底色更採用咗「教主」Anson Lo（盧瀚霆）專用嘅粉紅色，網民起哄要求出埋黃浩然、吳毅將、張立基、陳庭威、何家勁等閃卡，仲話亞視「第一代教主」張立基同「教主」Anson Lo撞樣。網民留言超級笑爆嘴，「沒有姜B只有何B」、「無劉志榮算係點？」、「煎Pan洗唔甩亞視味」、「我想儲呢set！」
關鍵字
最新回應