江嘉敏獲劇組補祝27歲生日 為趕食宵夜撞破驚喜

本月4日是江嘉敏的27歲生日，距離今日都已過了十多天，不過依然有人送上利是及蛋糕為她慶祝，果然多人痛錫。江嘉敏近日正忙於拍攝TVB新劇《四十二章經》，昨晚（16日）她在IG分享開工時獲劇組送上驚喜補祝生日，相中見江嘉敏跟一同演出的鄺潔楹及黃山怡（糖妹）齊齊捧着蛋糕影相，還有她跟劇組人員以及鄭子誠的合照。此外，江嘉敏在電視城化妝間時，更獲前輩馬海倫送上大利是，總之有心唔怕遲。

江嘉敏留言謂：「好開心，由喺台灣嘅《殺手》開始，我每一年生日都係拍緊陳Joe（陳維冠）監製嘅劇，而每一年佢都會親自買生日蛋糕比（畀）我！仲會專登夾埋啲演員同成隊crew嚟比（畀）驚喜我！有一年，陳監製無端端發脾氣要我重拍一場戲，仲瘋狂要我NG，我嗰陣心裡面驚到面都青埋，一擰轉頭見到啲導演拎住生日蛋糕行埋嚟！真係嚇死我！今年仲好笑，因為我太為食嘅原因，一聽到放宵夜即刻9秒9行去拎魚蛋粉食。點知一轉彎，唔小心見到陳監製同Judy好努力咁點緊蠟燭，然後佢哋就直接將個蛋糕放係我手到叫我自己點蠟燭！我愛你哋！」