咬甩趙家賢耳案｜受襲女認口供有遺漏 唯肯定親眼見被告出腳

前年11月初於太古城中心外1名中年漢陳真涉嫌拿刀襲擊多人，該區時任區議員趙家賢上前勸阻時遭咬甩左耳，陳真否認3項有意圖而傷人罪及1項普通襲擊罪，案件今日於高等法院續審。另一名受襲女士作供指，堂妹夫與被告口角期間被告將背囊移到胸前，右手放入背囊，其後右手已離開背囊，向堂妹夫背部「打咗4、5下」，堂妹夫表情痛苦，身上黑衣「濕咗」，「背脊好多液體湧出來」，自己遂估計堂妹夫受傷流血，堂妹和自己先後上前阻止均遇襲。

受襲女士梁瑩瑩憶述案發當晚相約了堂妹夫婦2人晚膳，到太古城吃上海菜，當晚由梁母先行到餐廳。5時許太古城商場內有社會活動，梁等聽到廣播告知即將關閉，遂沿側門離開前往餐廳。期間一名灰衣男即被告穿過梁眾人，出門後突然在梁等身後以普通話「大嗌唔知『光復台灣』定『光復大陸』」。堂妹夫隨即回應「你講乜X嘢？」當時被告背上背著黑色背囊，聞言停步，與堂妹夫口角數句，堂妹又上前「講兩句」，期間被告將背囊移到胸前，右手放入背囊，梁走前調停叫雙方「唔好嘈」。被告向堂妹走前兩步，梁「覺得佢想郁手」攻擊堂妹，被告又以廣東話說「我死唔緊要」，梁警告「你唔好郁手呀」。

梁續指被告隨即推開自己，堂妹夫在被告身後意欲阻止，被告遂轉頭面對堂妹夫，2人開始糾纏，互相捉住手腳。被告其後右手已離開背囊，向堂妹夫背部「打咗4、5下」，堂妹夫表情痛苦，身上黑衣「濕咗」，「背脊好多液體湧出來」，梁遂估計堂妹夫受傷流血。堂妹夫隨即叫道「佢有刀，你哋快啲走」，堂妹衝前嘗試分開2人，被告遂放開堂妹夫，轉而攻擊堂妹，「捉住隻手件衫唔放」糾纏，梁擔心堂妹受傷，遂衝前推開2人，被告沒有放手，2人一同倒地，當時堂妹夫在旁彎腰而立，表情狀甚痛苦。梁續指被告隨即放手起身，「開始打我，捉住我，（用）拳頭打我好多拳」，梁掙扎分開後，被告再用背囊「好大力撞我個身3、4下」，令梁跪倒在地，被告再扯梁頭髮，「扯起一陣再放手」。梁瞥見左邊地上有一把木柄短刀，上有血漬。有人查問被告「點解打人？」被告答「我唔係打人，我打狗」，隨後再腳踢梁頭部一下，令梁癱倒在地。梁「之後聽到好嘈」，被人扶起。此前梁看見堂妹夫2人「攬住一齊走咗去另一邊」，其後「瞓咗喺度，有人幫佢急救緊」。

梁瑩瑩盤問下解釋當時聽到「光復台灣」後「個人冇乜反應，（因為）唔知咩意思」。梁否認堂妹當時曾拉住被告不予離開，肯定當時被告右手在背囊內，反駁辯方代表大律師鄭從展質疑指「冇可能（喺外面），因為好近」。梁亦肯定被告曾用廣東話說「我死唔緊要」，又提到堂妹夫曾言「呢度係香港，唔係大陸」，但忘記是否曾有人出言指「你個大陸佬」。鄭從展引述其事後口供中指「畀人踢咗下頭部」，質疑並非出自被告，梁承認口供有遺漏，但肯定表示親眼見到被告出腳。

被告陳真被控於2019年11月3日，在香港太古城太古城道18號太古城中心外，意圖使溫浩倫Louis、梁碧琪、趙家賢Andrew身體受嚴重傷害，而非法及惡意傷害三人；另被控於同日同地襲擊梁瑩瑩。

法庭記者：陳子豪

建立時間11:35
更新時間15:25