許廷鏗有20幾個造星「囡囡」陪過聖誕不談愛情只有親情

2021-11-14 18:15

許廷鏗今日到旺角出席活動，他稱已多年沒有踏足旺角鬧市，並指以前經常到這裏行街、購物及吃臭豆腐等小食，適逢聖誕將至，今次也會順道買禮物。提到聖誕是浪漫佳節，他直言：「有得拍拖當然好，但我已過咗好多個Lonely Christmas，今年亦會喺工作中度過。」

今個聖誕節，許廷鏗將以導師身份出席《全民造星IV》決賽，他抵死道：「一係冇女仔共度聖誕，一係就同20幾個女仔一齊過。（搞多角戀？）係呀，萌生咗20幾段戀情，搞到我手忙腳亂、手舞足蹈。原本我認為男女授受不親，同女仔好少有親密接觸，但學員會衝上來攬住我，雖然唔習慣，但呢種感覺冇enjoy好多年喇，好應該enjoy下。」

不過許廷鏗自言只當她們是「囡囡」，只有親情而非愛情，還很感動有學員跟他說「一日為師終身為父」。他承認對參賽者有偏心，除了邱彥筒（Marf）外，還有多個被看好是明日Superstar，很期待聖誕過後誕生的女團。