獨家│林盛斌眼利捉實余詠珊吹水 Keep住用長銀包增財運

林盛斌（Bob）喺TVB出名多Job，有肉地又有喜感嘅外形仲係廣告客戶寵兒。Bob平時忙到無停手，日前喺又一城見到佢都急步行，唔知係咪趕開工呢？不過佢半路中途撞到前TVB高層余詠珊（Sandy）都好識做，企定定打招呼，對住前高層都咁有禮貌，抵佢多Job做啦！採訪：譚壹致

日前晏晝3點半，見到Bob喺又一城好似支箭咁急步行，飛奔去詢問處畀泊車錢，加上佢圓碌碌嘅身形，相信有唔少途人都認到佢。其間拎出一個好熟口面嘅名牌長銀包，冇錯！舊年佢曾經喺社交網出Po分享旺財秘訣，提網民可以用長銀包增財運，佢就覺得好有用。仲話長銀包要愈換愈貴，當時就係分享呢個名牌長銀包嘅相。又話用長銀包呢個習慣已經Keep咗10年，呢日見佢仲用梗長銀包，睇嚟真係愈搵愈多。

見前高層余詠珊即企定

趕住去攞車嘅Bob中途撞到前TVB高層余詠珊(Sandy)，Bob做開主持一眼關七，即刻捉實Sandy打招呼，寒暄足30秒。Sandy其實都好趕時間，所以佢同Bob講再見之後就急急腳去到餐廳門口，會合一名女友人食泰國菜做下午茶。佢哋等位嗰陣都主動用「安心出行」App，用餐期間余詠珊講嘢手勢多多，似乎幾激動，最後由朋友找數請食飯一齊走人。