獨家│鄧小艾行街睇毛孩過日辰 一支公魂遊銅鑼灣

已故「慈善伶王」新馬師曾鄧永祥（祥哥）和祥嫂生前十分喜歡養貓狗，四名子女也受到父母的影響，一樣喜歡養寵物，家中的貓貓狗狗更多得驚人。其中二女鄧小艾不但養了10多隻愛犬，就連行街都是睇貓貓狗狗，日前就見到小艾行入寵物店望着店內的一隻隻毛孩，打發時間。採訪：梁志明

鄧兆尊胞妹鄧小艾自離婚帶同兒子搬回永祥大廈，話咁快囝囝已長大，更已經成年，小艾不用再湊小朋友，平日就與愛犬為伴。日前黃昏6時左右，她一個人現身銅鑼灣總統戲院附近，當日見她打扮街坊，穿上灰色Tee襯四個骨褲在街頭行來行去，最初她走入一間寵物店，由店內走到店外、其間木無表情眼望望，之後向店員查詢後，便走到門外打電話，一講就接近5分鐘，之後她再折返店內，但轉頭又行返出去，然後又繼續打電話，再到對面馬路的另一間寵物店望了幾眼，不過無所獲，便兩手空空離開。

購物目標為本

之後小艾轉到隔鄰的個人護理產品連鎖店，原來她打算買眼藥水，而且一買就幾支，見她快快手就到收銀處找數，未有在店內閒逛睇其他嘢，購物慾相當低。可能因為住得近的關係，她畀錢時沒有多付5毫膠袋錢，只是將幾支產品夾在腋下就轉身離開，然後步行返回永祥大廈。年前鄧兆尊接受訪問時，曾公開四兄弟姊妹原來合共飼養數十隻寵物，兆尊有10隻貓狗、鄧兆榮有1隻狗，而最細的鄧碧玉最誇張，養了26隻貓，至於小艾也有16隻狗，當時她表示愛犬大部分是收養回來，而她又比較隨意，沒有刻意安排寵物接受訓練。