拳王│張振朗泵脹40磅谷巨腩 清淡餐單地獄式操練爆朱古力肌

將接檔《星空下的仁醫》於11月23日（周二）開播的TVB台慶劇《拳王》，在早前發布的首條宣傳片中，男主角之一的張振朗，苦練多時的爆肌造型終於曝光，脹爆的胸肌配以零脂肪、線條靚絕的無敵朱古力肌，吸睛度爆燈！

據知，振朗為了Build出靚肌確是下了不少苦功。早於劇集開拍前一年多，他已開始為操肌做準備，第一步是谷肥自己：「當時一日食五餐，主要都係牛扒同大量嘅飯，因為要先谷肥，增加脂肪同埋肌肉，咁樣操番弗嘅時候啲肌肉先至會更加有份量。」「日食夜食」食足一年後，振朗成功「泵脹」自己，增重多達40磅之餘，更谷出驚人巨腩，他笑言：「增肥嗰陣咁啱有兩套劇出街，就係《使徒行者3》同《踩過界2》，當時好多人話我肥咗。」

接下來的半年，便是地獄式的操肌訓練以及超清淡健康餐單；據知由於吃白烚雞肉吃到懷疑人生，振朗聽從教練建議飲雞水：「因為每一日食嘅（雞肉）量要好多，飲雞水可以補充到足夠嘅蛋白質，又唔使好似食擦子膠咁，個過程幾有挑戰性，辛苦但係對自己身體了解多咗。」觀乎製作組發布的宣傳照，振朗全身上下均弗至無懈可擊，就連背部線條亦操得相當完美，可見下了不少苦功。張振朗在劇中飾演為復仇去到好盡，性格正直熱血，黑白分明，堅毅不屈的海正藍，並會與黎耀祥、黃子恒及朱敏瀚有大量對手戲。