姜濤紀錄片首播自覺有抑鬱 跟花姐講私事媽咪冇份

MIRROR人氣王姜濤早前透露會推出紀錄片《答案》，希望外界及「姜糖」更能認識真正的自己。紀錄片今晚9點在YouTube播出，甫開始是姜濤跟師父梁業（肥仔）在排舞室排舞，他謂：「我拍呢條片唔係想多啲人鍾意我，你睇完呢段片可能唔會咁鍾意我。原本你可能鐘意我，但睇完覺得我唔係你想像中咁，但我都覺得唔緊要。」期間他又反笑肥仔「偶包」重，不能不戴口罩出街，肥仔又反寸姜濤：「我起初教你跳舞都冇嫌你。」肥仔又指排舞室有射燈，排舞師問他們會否怕影響，但肥仔爆姜濤竟說：「佢竟然話因為佢喺度，佢進化咗唔係以前嘅佢，佢以前唔會講啲咁嘅嘢，佢真係囂張咗。」

接着鏡頭轉到維園籃球場，片中見姜濤打波時發脾氣的樣子，他坦言：「如果真打我就唔留手。」姜濤又指不時有姜糖在球場等候及想合照，但他怕自己污糟，故會拒絕及跟朋友突然跑走。重提早前在IG貼出“I' m tired of everything”的厭世字句，姜濤說：「嗰日由化妝至開工前都好正常，冇唔開心，但到開始拍攝突然情緒好低落，突然唔知自己做乜，加上呢年發生好多事，屋企同朋友，嗰吓突然好抑鬱，突然覺自己有抑鬱症，前一秒仲笑，下一秒就黑晒面。」

尾聲姜濤在錄音室為《Dear My Friend,》補錄一句，監製透露經理人黃慧君（花姐）私下大力讚他，坦言花姐很少如此激讚，姜濤聞言即沾沾自喜，鏡頭一轉兩人坐在車上，花姐笑言：「你好似啲小朋友攞到100分咁，然後周圍同人講。」姜濤又坦言會跟花姐傾私事，有些甚至連媽咪也不知。