古天后日誌｜資金繼續偏好新能源及消費股

11月8日，天晴，天氣顯著轉涼，天氣乾燥，出門要添衣。美股上周五繼續做好，三大指數再創收市新高，道指升203點；標指跟納指分別升17及31點。美國聯儲局上周完成議息，維持息率不變同時，宣布11月開始縮減買債，但同時表示，縮減買債計劃完全後，並唔等於要立刻加息，並從新通脹只係暫時及短暫情況。市場認為聯儲局繼續放鴿，股市維持樂觀情緒。

美股強勢持續，港股繼續落後幾十條街，上周五ADR跟夜期均反映港股偏軟，估計今日港股將繼續下試支持位，估計24500至24600有支持。人家美股大大小小股份齊破頂，港股呢邊就畀重磅科網股拖死，ATMX難逃一跌，就連雙十一將至，相關概念股如京東(09618)等亦炒唔起。

港股呢邊嘅企業亦已陸續公布季績，雖然仍受資金歡迎嘅新能源汽車股，部份業績唔算理，但市場未見對此太大反應，反而將注意力放O左去月度銷售數據方面，令相關個股如比亞迪(01211)即使績後批股，仍能保持上升形態，反映資金並未有離棄呢個板塊。而新能源股亦唔多受業績影響，同樣係業績後稍為回調，已見有資金趁回調吸納。

相反醫療醫藥股表現疲弱，業績不及預期嘅醫療服務股跌到一仆一碌，業績符合預期的醫療器械及醫藥股則表現呆滯。而高瓴減持及最近一級市場醫藥企業月度融資額環比下滑嘅負面消息下，CXO無視三季度業績超預期利好因素，近日跌勢顯著，龍頭藥明生物(02269)恐連紅底股身份亦不保。

相反受高基數及今年疫情反覆影響嘅消費股，雖然業績表現平平，甚至有O的難睇，反而上周消費食品股，及必需消費品相繼提出加價計劃，支持板塊做好。有分析認為今年提價主要為抵銷原材料成本，但預期明年原材料價格下降後，呢類消費品會繼續保持最新售價。屆時必需消費品嘅毛利率有望上漲，難怪資金願意流入相關股份。

古天后

(徐狄怡，證監會持牌人)