蔡卓妍不在港派貓咪陪慶生 賣口乖祝餅印媽咪日日都靚

蔡卓妍（阿Sa）係出名嘅孝順女，噚日（5日）係Sa媽生日，阿Sa雖然唔喺香港，但都有越洋為媽咪慶祝，喺社交平台上載媽咪嘅舊相，拎住大束鮮花，笑容滿載同貓咪合照，真係同阿女餅印一樣。阿Sa乖巧留言：「Happy birthday mum！今年雖然陪唔到你過生日，但係我派咗嚦咕（貓）同你慶祝，祝你身體健康、日日都靚、日日都開心，Miss u sooooooo much。」

而阿Sa最近就返內地，同「龍虎豹」容祖兒及鍾欣潼一齊拍攝內地綜藝節目《容我Sa嬌》，佢透露網絡收得有啲差，一直以為自己出咗post，但原來遲咗，但唔緊要啦，有心唔怕遲，Sa媽見到個post都會甜在心頭，吳千語、鍾舒漫、周家怡、容祖兒、鄭欣宜等都有留言向Auntie送上祝福。