丁子朗恨拍戲提名金像獎

　　（星島日報報道）今年24歲的丁子朗，5年前的暑假隻身從加拿大回港參選《香港先生》入行，熱愛演戲的他，在不少劇集中都獲安排重戲份演出，丁子朗為求進步更專登找老師學戲，更希望有一日可以「放眼世界」，能像陳法拉一樣衝出香港。

　　入行以來，丁子朗曾經參與過10多套劇集，連同綜藝及主持等的工作，TVB的確給予了他不少機會，丁子朗在參演的《把關者們》有不少戲份，亦有機會在青春劇《青春不要臉》擔大旗，初嘗做主角滋味。丁子朗對於每一個機會都十分感恩：「好開心有機會拍《把關者們》，我入TVB第一套劇就係拍監製關樹明的劇集《再創世紀》，當時真係唔合格，之後就冇再搵過我，哈哈！但其實佢好錫我，今次佢再問我有冇興趣參演，我當然一口應承！」

　　丁子朗對自己有要求，還有遠大目標，希望日後有機會衝出香港，目標不只是「視帝」，而是金像獎提名：「好想拎到金像獎提名，就已經很足夠！我想試吓提名電影，以前會覺得TVB嘅演員要去到荷里活級數係好難，但近年陳法拉在國際大電影做到女主角，佢做到嘅事情話俾我知仲有可能！」問到有否向經理人要求為自己爭取拍電影的機會？丁子朗笑說：「梗係有啦！不過每次提出，經理人都會叫我拍好劇集先再講！哈哈！」

　　在《把關者們》內，丁子朗是個戀愛白痴，而現實生活中，他就認為現代女性追求男生都很明顯：「以前父母年代會說『女追男隔層紗』，但現在已經係直接話不如一齊，但我本人對於感情比較希望好像劇情一樣，由不相識到朋友，之後『升呢』做戰友，再升做知己、有啲曖昧，再下一階段就係有情人終成眷屬，自己認為這個階段是最好。」

　　曾經表示自己喜歡演戲多過做綜藝節目，現在的丁子朗更享受做司儀，他表示：「我真的很享受拍戲，司儀我都鍾意做！之前有機會做港姐司儀都覺得好開心，拍劇需要兩三個月至半年，司儀可能只係一晚，加埋之前嘅準備功夫可能三四晚，但做司儀可以運用自己的腦筋，令全部人都要聽你講嘢，直播冇得返轉頭，我覺得好有挑戰性！」

　　在繁忙工作中，丁子朗深明「吊頸都要唞吓氣」，這樣才能夠令自己走更遠的路，所以最近他培養了一個新興趣，做了「板仔」，他興奮表示：「今年睇咗奧運，見到人哋踩滑板好型，咁我就去嘗試，所以最近就做咗『板仔』！超級鍾意！無論幾忙我都會抽時間去踩，可以當做運動，又可以放鬆心情，因為嗰一刻要好專注，可以將煩惱拋諸腦後，對我來說是情感的釋放！」