全民造星IV｜16歲阿Yo靠後生踢走樂隊主音Ashi 評判導師爆分岐
2021-11-03 23:45 
以打造女團為目標的《全民造星IV》，今晚播出第三集，評判由朱栢康、DJ Donald和鄭融擔當。今集出場以13號28歲獨立樂隊小紅帽主音Ashi，對決92號16歲巨鼻學生妹阿YO最受爭議。Ashi面試時，已經忍唔住落淚，事關許廷鏗（Alfred）突然問Ashi：「我想問小紅帽成員點睇你參加《造星》？」之後又叫Ashi對住鏡頭向隊員講，Ashi講吓講吓就開始落淚。
Ashi於第一回合表演自彈自唱《Just the Two of Us》，一開口就獲得花姐好評「好聽喎唱得」，Alfred都表示：「得啊」，似乎對Ashi嘅表演好滿意。不過三位評判就有唔同睇法，朱栢康就直指Ashi觸動唔到佢，對其表演似乎冇好感。
而與Ashi對決的16歲阿Yo就俾花姐點名，指罵她表演時不斷想企前突出自己，騷擾其他人，花姐對佢印象非常差。阿Yo喺第一回合就選擇跳舞，背景歌係Anson Lo的 《EGO》，成個表演都被花姐同兩位導師批評，花姐直言，「咁樣跳有咩意思？」
不過三位評判似乎對阿Yo的表演好滿意，開口就大讚。結果阿Yo以三盞紅燈成功晉級，Ashi則落入淘汰區。如此結果即刻嚇窒花姐同兩位導師，花姐仲爆咗句：「啲評判好攰呀？」，對結果好似唔太滿意。而兩位導師都無撳燈，最後被三位評判安排入Alfred隊伍，佢相當無奈。
最新回應