換命真相丨倪嘉雯獻出螢幕初吻 感激劉佩玥無私分享神還原角色

TVB台慶劇《換命真相》自開播後，無論是張旻（鄧佩儀飾）、歐陽家純（蔣家旻飾）、楊紫山（劉佩玥飾）、朱筱筱（陳庭欣飾）之間的友情戲，或是時光（譚俊彥飾）及朴寶劍（朱敏瀚飾）的HeHe情一直備受好評。

昨晚（1日）一集，旻與家純因時光反目，家純傷心出走後去了寶劍屋企，最後搞出六國大封相；期間紫山向旻重提當年四姊妹反面舊事，原來當年紫山因有感旻被渣男欺騙感情，遂以自己做餌試探渣男，豈料遭對方強吻，還因而被旻誤會撬牆腳。

昨晚劇集重心落在飾演學生版的倪嘉雯（Carmen）、黎康祺、羅毓儀及吳天兒身上，當中尤以飾演紫山的Carmen最為搶戲，舉手投足似足劉佩玥（Moon），羅毓儀則被讚樣子超可愛。問到Carmen神似之道，她感激阿Moon無私分享：「我有返廠睇阿Moon拍，試過睇通宵，盡量學佢嘅口頭禪、小動作同語氣。其實真係好感謝Moon，佢只要一有時間，就會同我分享佢點做個角色，例如會成日撥頭髮，講嘢會好快，全靠佢我先吸收得咁快。有啲場口我唔知點做，我都會請教佢，佢都好好人會幫我分析。」Carmen又指是次是首度演出有名字的角色，更獻出了螢幕初吻，故拍攝時感到「雙倍緊張」。

今、明（2日及3日）兩晚劇情，向來予人感覺乖乖的劉星（丘梓謙飾）行為會變得古怪，不但不斷犯錯，更疑似偷竊兼經常精神萎靡，遭家純懷疑染上吸毒惡習。另維利大廈關鍵人物琴姐（寶珮如飾）的神秘面紗將逐步被揭開，背後更隱藏著感人兼令人心痛的故事，敬請密切留意。