吳彥祖實現願望做賽車手 指老婆Lisa S.騎馬仲危險

吳彥祖（Daniel）早年已跟太太Lisa S.及囡囡搬回美國居住，但因近年疫情關係，他未能返港工作，但與此同時卻令他重拾賽車興趣，甚至成為了職業賽車手，一切由零開始，好兄弟馮德倫即構思拍片紀錄Daniel的轉變及比賽過程，並找來擔任《林書豪 Linsanity》紀錄片導演Evan Jackson Leong幫手，製作成《吳彥祖的速度之旅》（Journey to Speed）紀錄片。

Daniel已積極參加賽事，他謂：「今年參加咗六場團體賽，暫時我哋總成績排第二位，希望可以一直保持，同埋以我咁新嘅車手，可以攞到呢個成績算好好。另外年底會跟隊友挑戰一個叫做『Thunderhill Raceway』嘅賽事，需要連續25小時不停去比賽。希望大家睇完呢套紀錄片，可以見到另一面嘅我。」但賽車有一定危險，Lisa可有反對？Daniel謂：「賽車係快，但唔算危險，起碼我架車有防滾架、有頭盔、有頸箍保護，相比Lisa去騎馬得個頭盔、跳馬更完全冇保護，所以佢無特別意見。」

問到何時回港拍戲？廣東話有否退步？Daniel表示：「如果有戲拍我會返嚟，但我驚自己接受唔到一個人喺酒店留21日，所以可能等多一年，唔使隔離就會返嚟。而家比賽有另一隊對手係香港人，雖然我哋係敵對，但我一見到佢哋就好開心，因為可以同佢哋講吓廣東話，但始終少機會講，係差過喺香港嗰陣。」而Daniel的短片每星期也會在Highlighter Channel播出的fb及IG播出。