李樂詩任Joe Junior個唱嘉賓獲掌聲支持 48歲生日只望身體健康
2021-10-26 12:30 
今日48歲生日嘅李樂詩（Joyce），今年8月證實患上家族遺傳病乳癌，兩邊乳房都發現了5粒初期癌細胞，並於醫生建議下緊急入院開刀保命，接受咗8小時手術切除兩邊乳房，由於傷口好大，未能即時植入義乳，不過，Joyce身心已慢慢康復，昨晚（25日）大病初癒復工，到沙田大會堂為Joe Junior舉行嘅《POP LEGEND JOE JUNIOR IN CONCERT》出任嘉賓，演繹3首歌曲時聲音嘹亮，狀態大勇，贏得全場觀眾掌聲，令她相當感動。
老闆送蛋糕賀壽
Joyce喺生日前夕復工，下午先去會場「踩台」，見她身穿黑色恤衫加外套，已卸下用來「遮護」胸前的頸巾，笑容滿面，心情大靚。期間Joe哥及環星娛樂老闆張國林送上蛋糕為她預祝慶生，Joyce生日願望，祝大家都身體健康。
掌聲雷動好感動
對於病後復工，老公緊張相伴，從旁支持。當晚Joyce悉心打扮揀選咗一套白米色長袖連身裙現身，靚文大方，喺內衣嘅襯托下填補咗身體缺失。當Joe Junior介紹Joyce出場時，全場已掌聲雷動，Joyce每首優美嘅歌聲都贏嚟全場掌聲，搞到Joyce返入後台時心情仍未平伏，興奮到不得了說：「反應好好，真係好感動呀！」另外，完場時歌迷兩度encore也不肯離場，Joe哥見盛情難卻，再次出場演唱了首本名曲《here's a heart》嚟答謝觀眾。
最新回應