獨家丨李樂詩穿鬆身恤衫綵排好中氣 切除乳房手術後首復工

今年8月，下周二便48歲的李樂詩（Joyce）證實患上家族遺傳病乳癌，兩邊乳房都發現了5粒初期癌細胞，並於醫生建議下接受手術切除兩邊乳房。經過兩個月治療，Joyce身心漸見康復，日前更落實為Joe Junior的演唱會擔任表演嘉賓。前日Joyce病癒後首度復工現身綵排，唱歌中氣十足，完全唔似癌病康復者。採訪：方騫平

Joe Junior本月25日及11月1日分別於沙田大會堂及文化中心舉行《POP LEGEND JOE JUNIOR IN CONCERT》，主辦商環星娛樂邀請咗跟Joe哥「同聲同氣」嘅李樂詩擔任表演嘉賓，雖然Joyce冇因為健康問題而辭演，但主辦方做定兩手準備，而且喺演出前最後一刻先安排她做綵排，讓她爭取更多時間休息。

笑容滿面好精靈
由於要切除兩邊乳房傷口頗大，李樂詩曾經傷口發炎要服食抗生素。幸而經過兩個月休息漸漸康復，身體狀況能應付表演，故決定繼續為Joe哥個唱演出，到時她將會演繹3首英文歌，包括合唱歌《You Raise Me Up》。日前她到觀塘環星跟Joe哥及蘇姍綵排，老闆張國林及「環星一哥」尹光特地嚟探班打氣。身穿鬆身白恤衫配碎花頸巾嘅李樂詩，面色紅潤加上笑容滿面，完全唔見有病容，期間相當精靈冇NG，明顯喺屋企經已練好晒歌，做定功課，故綵排咗一個小時可以先行離開，走前個個都送上關心，叮囑她要多啲休息。