Juicy叮|女童扭計養倉鼠港媽求其買細籠安置 店員拒賣:你應該教佢尊重生命

2021-10-25 18:01
一名港媽為氹扭計中的女兒,竟求其購買一個細小的手提籠安置倉鼠,最終被店員拒售。unsplash示意圖
一名港媽為氹扭計中的女兒,竟求其購買一個細小的手提籠安置倉鼠,最終被店員拒售。unsplash示意圖

父母的身教直接影響子女的行為及價值觀,但不時有網民分享「怪獸家長」的奇葩行為。有網民早前在facebook專頁「香港倉鼠交流區」投稿,指最近目睹一名女童「扭計」要求父母買倉鼠,當時女童的母親竟指着店內一個只有A4紙大小的手提籠,要求購買手提籠及倉鼠。店員解釋手提籠太細不適合倉鼠居住,推薦她們購買一個較大的,惟港媽拒絕並指「我哋覺得呢個太大啦,囡囡爸爸都唔同意買咁大。」

一名較資深的店員其後到場向港媽表示:「我哋係唔會賣畀你,除非你係買埋一個合適嘅籠畀隻倉鼠仔」,提醒港媽應以身作則,「倉鼠係一個生命來,你應該係好好哋教育你囡囡,等佢知道點樣尊重呢個生命」,惟港媽竟語出驚人指「咁我哋淨係買隻倉鼠唔買個籠囉!」,最後店員「企硬」拒絕出售倉鼠予港媽。

目睹事件的網民直指港媽「無得救」,又慨嘆身教很重要,「店員其實真係講得好清楚佢哋最基本嘅需求係乜,只係嗰兩個家長為咗氹掂扭計嘅囡囡,諗埋晒啲咁嘅行為,所以話身教真係好重要。」

事件引來多名網民討論,稱讚該位店員非常盡責及有原則,沒有因為倉鼠的價錢便宜而罔顧牠生存的應有權利,「真係唔應該為咗一個扭計嘅小朋友而去買隻鼠鼠返嚟害咗條生命」、「好嘅店員真係好少有,畀100個讚」、「畀個讚個店員好負責任」,另外亦有人批評港媽未有當倉鼠是一種生命,只當玩具,沒有在女兒面前做好身教。

來源:香港倉鼠交流區

關鍵字

最新回應

關鍵字

相關新聞

熱門文章