馬明奉命扶實靚湯 戲言：好似有咗

　　（星島日報報道）馬國明、湯洛雯這對愛侶近日各自忙拍劇、少有合體，平日露面亦少講私事，但昨日在《無線節目巡禮2022》中就大方合體並頻頻放閃光彈，馬國明大讚湯洛雯肥瘦都靚，又指她是「慣性拗柴」，要奉伯母之命「睇住」女友，更攙扶女友笑她似「有咗」！而湯洛雯透露新造型獲男友讚「看起來更後生」，又形容馬明媽媽是「親愛之人的媽咪」。

　　馬明與靚湯分別代表《隱形戰隊》以及《OPM》亮相節目巡禮紅地氈，大方雙雙受訪，靚湯以新髮型及花裙亮相，問馬明會否覺得她瘦了靚了？他笑言健康便靚，瘦不一定靚，最重要無病無痛。靚湯自爆日前跣落樓梯擦傷，被人取笑是否遭家暴，媽咪更着馬明「睇住她」。而馬明被女友指拍打戲周身傷，他指打鬥戲難免都是小傷，不似女友「慣性拗柴」。問是否互捽藥酒？靚湯笑言未到此地步，但幫男友按膊頭穴位，馬明則笑言：「我可以做的是扶住她，令她好似老人家、好似有咗！」靚湯笑指他亂講又令大家誤會。

　　問馬明會否聽伯母話、將靚湯娶回家睇住？靚湯笑言未講到娶字，只是多照看她，馬明指女友都有一個人的時間，靚湯笑指換了齊蔭髮型看起來細個了，被馬明取笑襯起她的智商，馬明即笑謂：「襯她性格細路女是好事，她有天真心境，我媽咪也是細路女，個性樂觀，的確會健康些。」問靚湯因此與伯母好好傾？她指對方很易相處。至於對方是否已視她為媳婦？靚湯笑言要問對方，而自己視對方為尊敬的人、親愛之人的媽咪。