青年心城｜游嘉欣首度攀石半天吊 驚到手心冒汗嗌救命

游嘉欣在TVB新劇《青年心城之撐起青春》首度升呢女主角，除了被讚演技OK，其甜美笑容及天然清純樣子亦為網民受落。在本周日（24日）播出的第三集，是集重點除了阿峰（林正峰飾）會遇上「頭號情敵」、因而醋意大生外，「焗住變頹」的阿峰更會重拾昔日「熱血」Mode，對不公平事件進行大控訴！游游則繼續發揮獨門可愛秘技，演繹大量Gfable表情包，包括期待、欣喜、傾慕及失望等。除了表情豐富大放送，游游新一集更會首度挑戰攀石。

熱愛運動的游游為了以最佳狀態拍攝，事前專誠抽空學攀石，相當專業；雖然做足準備，但游游坦言拍攝時依然險象環生，更拍至手心冒汗：「嗰場戲需要我吊喺半空嗌救命，因為我真係吊咗喺有啲高嘅位，當時我只能靠隻手掹住啲石，對腳係冇任何嘢畀我踩住，所以其實我嗰刻真係驚到出晒手汗，我嘅救命係真心㗎！不過整體成件事係好玩嘅，係拍完第二日對手勁酸痛、手指又冇乜力。」

在劇中飾演熱血富家千金「阿欣」的游游，劇中角色是集更會展示「驚人」地獄級廚藝，更食到阿峰乸晒口臉，相當爆笑。不過游游強調現實生活中的自己並非如此：「我煮嘢食OK㗎，我媽咪識煮嘅我都識，最鍾意食釀豆腐同釀冬瓜。我下廚有冇烏龍嘢？都有嘅，我試過想整糖番茄，點知落錯咗鹽，好鹹！」愈來愈弗的游游又指為了修身，平時很少外出吃飯，並開心Share節食心得：「盡量戒澱粉質，少油少鹽少糖，如果出街食通常只係食三文治或帶飯。另外我一路有做運動Keep住，因為如果唔Keep再減過好辛苦。」