獨家丨霍啟剛買白酒芝士Salami玩驚喜 老婆40歲生日抱埋大女揀首飾

2012年，被封為「最貼地富二代」的霍啟剛(Kenneth)娶咗「跳水皇后」郭晶晶，婚後晶晶誕下一仔兩女，一家五口好幸福。上周五係霍太40歲牛一，翌日霍生已經上載同老婆賀壽「食好西」嘅相到IG，因為兩人打扮樸素，又簡單食餐飯慶祝，冇炫富行為獲網民一致讚好。其實Kenneth同老婆慶生點只食餐飯咁簡單。上周四重陽節，本報就直擊霍啟剛抱埋4歲大女霍中妍去超市買白酒、芝士、Salami等及買首飾，明顯為翌日生日的老婆製造驚喜。採訪:張詠森

霍啟剛果然不負「最貼地富二代」稱號， 在IG貼同老婆食生日飯嘅相，對老婆講︰「不經不覺第18次給你過生日，祝你生日快樂、永遠18歲！」hashtag係簡單幸福、生日快樂、老夫少妻同霍太，其實Kenneth都只係42歲，擺明用老夫少妻嚟氹老婆笑。

大女好活潑
霍啟剛好錫老婆，亦願意花時間去氹老婆。上周四傍晚，霍啟剛同大女去咗中環太子大廈超市買嘢，因為公眾假期關係非常多人，但兩父女都冇唔耐煩，先去揀白酒然後芝士、Salami、果仁同薯片等，揀好就放落囡囡推緊嘅迷仔版手推車入面，着住橙色花裙仔嘅中妍好得意，推住車仔跟實爸爸行，仲幫手將食物放上收銀枱，半個鐘買完餐前小食同酒就離開。

齊試魚子醬
兩父女之後去咗睇翻糖蛋糕，由於無現貨拎完咭片就去睇魚子醬，因為有試食，霍啟剛即抱起囡囡一齊試。 之後兩人去咗睇精品，兜咗一陣就轉去名模蔣怡老公開設的珠寶首飾店。兩父女一齊揀禮物送畀郭晶晶，見中妍望住啲閃令令首飾入晒神，店員拎咗啲手鍊畀Kenneth睇，唔知最後買咗咩，但見Kenneth有簽單，相信郭晶晶收到老公同囡囡一齊揀嘅禮物必定好甜。